Maayong panglantaw sa unahan

Bisan pa man sa pagsige og reklamo sa ubang Pilipino tungod lagi sa kawad-on sa ilang pamuyo gumikan kuno sa tumang kalisod sa panahon, adunay pipila kanato nga pabiling positibo sa ilang kinabuhi ug naglantaw sa maayo nga kahimtang sa unahan.

Hinuon, dili kalikayan nga adunay mga sektor sa katilingban ang mawad-an na sa paglaum sa ilang kinabuhi nga moasenso pa. Kini tungod usab sa kahagip-ot sa dagan sa panahon nga bisan kon unsaon nila pagpaningkamot, dili gayud kini paigo alang sa ilang pag-asenso.

Daghan kanila ang mobasol sa atong kagamhanan tungod sa ilang giingon nga pagbaliwala sa atong mga opisyal paghatag og maayong serbisyo ngadto sa katawhan. Aw, dili na kini ikatingala pa, kay bisan pa man kon si kinsa pa anaa sa puwesto, padayon gayud kining mga yangungo.

Sa laing bahin, saludo usab ko niadtong pabiling nagtan-aw og maayong ugma sa ilang kinabuhi bisan pa man sa ilang kalisod karon. Sa hinayhinay nga pag-arangkada sa inadlaw nila nga gimbuhaton, positibo gayud sila nga makab-ot ang hamugaway nga kinabuhi.

Mao kini ang klase sa mga tawo nga dali ra nga moasenso. Kini gumikan lagi sa maayo nilang panglantaw sa unahan bisan pa man sa unsang unos nga mohuyop sa ilang kinabuhi. Suwerte ang ingon niini nga klase sa mga tawo tungod sa ilang attitude nga “never say die.”

Hinuon, dili sa tanang panahon nga anaa kita sa tumang kalisod. Moabot ra gayud ang maayong dagan sa kinabuhi, ilabi na kon ang trabaho inubanan sa determinasyon ug paningkamot. Dili ba ang kinabuhi sama sa usa ka ligid nga nagtuyok? Usahay anaa kita sa ubos, ug usahay anaa usab kita sa taas.

Sa padayon nga pagsulbong sa ekonomiya sa nasud, klaro usab nga aduna kini maayong epekto sa dagan sa atong kinabuhi. Ang maayong tuyok sa ekonomiya moresulta usab sa pagdani og mga investment gikan sa business sector ug nga moresulta usab sa paghulma og daghang trabaho.

Mao na nga importante nga padayon kita nga adunay positibo nga panghunahuna sa kinabuhi. Mao lang kana ang paagi kon gusto kita nga moasenso.

Hinuon ang pag-asenso resulta usab kana sa kakugi, kay kon magtungok lang kita sa daplin ug sige nga mobasol sa gobiyerno tungod sa atong kapobrehon, wala’y positibo nga kahimtang nga mahitabo sa atong kinabuhi.