Sekreto sa himsog nga panagtiayon

Mao kini ang atong naobserbahan sa kadaghanan, nga wala na kaayo kahatagi og pagtagad ang kabililhon sa himsog nga panagtiayon. Nataligam-an nga kini usa ka epektibo nga ingrediyentes sa malungtaron nga panag-uban diha sa salag sa kaminyoon.

Hinoon, ato na ning nabuhat sa dihang manag-uyab pa, gihimo ang tanang atraksyon, aron pabilin ang katam-is sa pinarayeganay, hangtud nga nakaabot sa altar nga nanumpa nga mag-inunongay sa kalisud ug kalipay.

Apan dili malilong, daghan sa kaminyoon ang pakyas sa malungtaron nga panag-uban. Unsaon, wala na mabuhat nga mamentin kadtong atraksyon sa panag-uyab nga nagdilaab ang labihang makapaso nga pagminahalay. Kalit lang nasubhan nga giunos sa mga pagsulay sa kinabuhi. Igo na lang sa panaad ang mga panumpa nga mag-unong isip magtiayon.

Gawas pa niini, usa sa hinungdan nga naawop ang kainit sa gugma, kay anaa sa atong hunahuna, nga salikwaot nga hilasan na kay lagi minyo ug edaran na. Mao na la’y gipukos ang kinabuhi diha sa paningkamot.

Bisan tuod nga sagad ato ni nga makita sa kabatan-onan, apan daghan pa kita nga nakita sa hut-ong sa edaran ug gani ang uban mga senior na.

Imong mahulagway nga ingon sa wa’y pagkaugtas ang himsog nilang panagtiayon. Isip giya ug pagpahinumdom niadtong nakaandam na nga mosulod niining butanga, repasohon nato, kini nga makapahimsog ug malungtaron nga panagtiayon.

Motultol sa sama nga oras kon padulong na maghigda – ingon sa uhaw sa kanunay nga kadulog ang kapikas. Sa dili pa matulog, nakadinayganay ug nagkasinabtanay sa unsa’y buhaton nga kanunay matagbawon ang usa’g-usa. (Sumpayan)