Gustong kuhaon sa inahan ang bata nga nagdako sa lola

Dear Atty. Divine,

Duna ko’y pangutana labot sa akong pag-umangkon nga anaa magdako sa akong inahan. Ang papa sa bata akong igsuon ug nagbuwag sila sa inahan sa bata dihang 1-year old pa ang akong pag-umangkon.

Milarga ang inahan sa gawas ug nagtrabaho abroad samtang ang bata gibilin sa akong mama kay nanarbaho sab ang papa. Karon miuli ang inahan gikan sa gawas ug naminyo na kini og foreigner.

Nakigsulti siya sa akong mama nga iyang kuhaon ang bata nga karon 5 years old na. Plano sa inahan nga petisyonan ang bata  ug dad-on sa  America. Ang akong pangutana kon may katungod ba ang akong mama nga dili ibalik ang bata sa inahan? Daghang salamat. —  Lucy

Dear Lucy,

Base sa atong balaod kon ang bata illegitimate, ang inahan gyud ang adunay katungod nga mo-custody niini. Sama sa kaso sa imong pag-umangkon kay dili man kasal ang imong igsuon ug ang inahan sa bata. Mahimo lang nga makuha sa papa ang custody sa bata kon mapamatud-an ang inahan nga unfit tungod kay immoral siya, drug addict, iyang gimaltrato o gi-abandon ang bata or duna siya’y sakit nga makatakod.

Apan kon tarung nga pagkatawo ang inahan sa bata, then dili gyud siya makonsiderar nga unfit ug duna gyud siya’y katungod nga maoy mo-custody sa iyang anak ug wa’y katungod nga mopugong niini ang imong mama bisan pa kon siya’y nagpadako sa bata. Ang maayo ninyong buhaton mao ang pagpakigsabot na lang sa inahan nga hatagan og higayon ang bata nga makabisita sa iyang lola ug papa kon moari sila sa Pilipinas.

Ang maayong kaugmaon sa bata maoy inyong ikonsiderar kay mas maayo man gyud ang iyang future kon tua siya sa US, so bisan tuod kon sakit sa imong mama nga mabuwag sa iyang apo, apan mas maayo nga iya sab nga hunahunaon ang future sa iyang apo. Thanks and God bless. — Atty. Divine