Mga gahi’g ulo

Daghan gihapon nga motorista ang nadakpan sa mga kawani sa Cebu City Transportation Office (CCTO) tungod sa pag-counterflow. Kini bisan pa man sa kasaba na kaayo sa isyu sa pagtanggong sa mga sakyanan ug sa pagpamulta sa mga driver nga milapas sa kamandoan ni Mayor Tomas Osmeña. Maoy gibantayan sa mga kawani sa CCTO ang Natalio Bacalso Avenue sa Barangay Bulacao kaniadtong Martes. Tungod sa kadaghan sa mga sakyanan nga gitanggong, hapit na mapuno ang impounding area nga nahimutang sa South Road Properties.

Ang mga driver nga gipamulta tungod sa paglapas sa lagda nga nagdili sa counterflow, nangatarungan nga wala sila masayod sa kamandoan sa mayor. Ang uban mirason nga nagdali sila, samtang may miingon nga namasin lang sila nga wala’y traffic enforcer nga nagbantay sa dapit nga sila didto masakpi.

Ang dakbayan sa Mandaue nga nangopya sa pamaagi nga gipatuman ni Mayor Osmeña, nanakop usab sa mga nag-counterflow sa ilang dakbayan, apan wala tanggonga sa mga kawani sa Mandaue Traffic Office ang mga sakyanan sa ilang nasita kay wala kini maapil sa ilang ordinansa, gawas lang niadtong mga sakyanan nga expire ang rehistro.

Ang kadaghan sa mga sakyanan nga natanggong sa impounding area maoy pagmatuod nga daghan ang mga motorista nga mga gahi’g ulo. Nagpakita usab kini sa kamatuoran nga daghan ang mga tawo nga wala’y pagpakabana.

Ang paglapas sa lagda sa trapiko sa usa ka motorista sa pamasin nga wala’y nagbantay nga traffic enforcer, kalidad sa usa ka tawo nga gahi’g ulo ug sa kaugalingon dili disiplinado. Mao kini ang usa sa hinungdan ngano nga wala moasenso ang kinabuhi sa tawo.

Ang wala’y pagpakabana sa panghitabo sa palibot maoy hinungdan ngano nga nahimong madaugdaugon ang katilingban. Mao nga angayan ug matarong lang gyud nga ang tawo silotan tungod sa wa’y pagpakabana ug sa iyang pagkagahi og ulo.