Counterflowing

Dugay na kitang gihasol ug gihasi sa abusado kaayong mga driver, ilabi na ang mga motorcyclist nga magpadagan sa ilang mga motorsiklo, as if sila ang tag-iya sa kadalanan, ug sa wala’y pag-consider sa ubang motorista ug sa pedestrian. Hawod gyud kaayo.

Panahon na nga masumpo kining mga abusado sa kadalanan, mga daredevils. Usa ako sa daghan na nga nabiktima niining ilang pagka-abusador. Ambot pila na ang nabiktima niining ilang pagkaabusado. Usa na ko niini, nagarasan ang akong sakyanan.

Nalipay kita niining Executive Order ni Mayor Tomas Osmeña nga mosilot sa mga driver nga mag-counterflow pinaagi sa pag-impound sa sakyanan sulod sa usa ka bulan. Sakit gyud kaayo sa hingtungdang driver ug tag-iya sa sakyanan. Makapatagam gyud.

Actually, there are existing traffic rules and regulations, among which nagdili sa counterflowing. Wa lang gyud ni tumana sa mga traffic authorities hinungdan nga giabusahan kini sa badlongong driver nga nag-feeling hawod. Hinaot nga tinud-on kini sa mga traffic enforcer. Tingali’g molungtad lang ni og usa ka semana. Maayo lang sa bag-o pa, unya, inigkataudtaod, mawad-an na’g gana. Kahibawo man ta nga moandar man gyud ang ‘ningas cogon’ natong sakit.

* * *

Hangtud karon, wala pa’y klaro kon unsa nga matang sa federalismo ang angay sagupon sa atong nasud. Unsa ang buhaton sa 1987 Constitution, i-upgrade ba lang aron ipahaum sa atong kahimtang karon, i-dismantle, i-overhaul ba gayud ug mag-umol og totally bag-ong Konstitusyon, o igo lang kining i-tune up ug pipila lang ka provision ang  papason sama sa mga economic ug subra ra ka mga nationalistic provisions.

Gipanghinaot nga ang nagtuki karon sa paghimo og kausaban sa Konstitusyon, magkasabot unta sila ug dili mopatigbabaw ang personal nilang mga interes.

Matud pa, daw dili sila magkasabot ug magkauyon sa specific nga mga prinsipyo, structure ug mga katungdanan sa gilaraw nga federal system.

Unta, maghimo sila’g common nga primer ug module bahin sa federalismo ug sa Cha-cha nga maoy basehan sa nagkalainlaing pundok nga karon nagsugod na og pangampanya bahin sa federalismo. Dili mag-iyahay aron dili maglibog ang katawhan.

Ambot kon magkasabot ba kini sila nga nagkalainlain ug nagkasumpaki man ang ilang mga interes. Tagsatagsa kanila aduna tingali mga hidden agenda.

Sa ilang information campaign kinahanglan dili mogamit og highfalutin, highly intellectual ug subra ka legalistic nga termino. Pananglitan, ilang ipasabot in simple terms nganong gutom ang katawhan, unsa’y nakaingon niini, ug nganong sayunsayonon man lang sa uban ang pagpangawkaw sa salapi sa lungsod.