Depression road, maka-depress

Ang depression road nga mopaingon sa tiilan sa Marcelo Fernan Bridge adunay walo ka lanes nga ang upat anha sa sentro sa tunnel ug maoy gamiton niadtong moagi sa taytayan, samtang ang laing upat ka lanes nga mahimutang sa taas, magsilbing service roads.

Ang service roads bahinon sa duha. Duha ka lanes, ang sa tuo para sa mga sakyanan nga moagi sa UN Avenue diin ang mga motorista moliko sa dili pa moabot sa taytayan dayon agi sa service roads. Ang laing duha ka lanes para kini sa wala nga habig sa UN Avenue ug mopadulong sa dalan M.C. Briones ug Plaridel.

Pinaagi niini dili na mag-abot ang mga sakyanan nga mopaingon sa lainlaing padulngan. Apan dili pa kombinsido niini si RDC chairman Kenneth Cobonpue mao nga iyang ipaabot ang suliran ni DPWH Secretary Mark Villar.

May katakus ba ang BM Marketing sa pagtrabaho sa proyekto? Marketing man gud. Kon maghisgot gud ta og marketing, pagpamaligya man ang trabaho niini. Apil ba sa trabaho sa BM Marketing ang pagtukod og mga dalan sama niining proyekto nga sugdan na nila sa pagtrabaho sa ikatulong kwarter niining tuiga?

Ang tawag sa dalan nga trabahoon sa BM Marketing “Depression road.” Apan ang depression road giingon ni Cobonpue nga gipatrabaho sa DPWH-7 nga wala’y pagkonsulta sa publiko ug wala’y gihatag nga maayong alternatibong dalan nga kaagian sa mga motorista nga maapektohan sa pagsugod na unya sa proyekto.

Napanglantawan ang grabe unyang suliran sa trapiko sa dapit. Mao kini ang hinungdan ngano nga ang “Depression road” makamugna unya kini og “depression” sa mga motorista nga moagi sa dapit sa project site.

Tungod sa depression nga mamugna sa proyekto ngadto sa mga motorista, dinhi, makaingon ko nga wala masayop ang DPWH sa pagtawag sa proyekto nga “Depression road” kay ma-depressed ka gyud unya sa grabeng trapik nga mamugna.