Dili makatarunganon

Aniay dili maayong balita alang sa mga motorista. Magsugod na pag-epekto karong adlawa sa dakbayan sa Sugbo ang executive order ni Mayor Tomas Osmeña nga mag-impound og usa ka bulan sa mga sakyanan nga masakpang mo-counterflow.

Gawas sa usa ka bulan nga pag-impound, adunay salapi nga fine usab nga ipahamtang sa mga sakyanan nga maka-violate sa maong order. Ug makapaabot kita nga daghang motorista ang mag-alburoto niining dako nga silot batok niadtong mo-counterflow.

Gituyo kini sa dakbayan aron usab nga madisiplina kining mga motorista nga nagtuo nga mga hari sa kalsada ug magpataka na lang og counterflow nga mao usahay ang hinungdan sa mga aksidente. Gani daghan usab ang misuporta niining maong executive order ni Osmeña.

Hinuon, dili usab nato mabasol kadtong mopiyait niining lakang sa dakbayan, ilabi na niining usa ka bulan nga pagka-impound sa sakyanan nga mo-counterflow. Tan-aw nila subra ra kaayo kining silot nga usa ka bulan nga pagtingkagol sa mga sakyanan.

Adunay rason usab sila nga mag-alburoto niining dakong silot sa dakbayan batok sa mga sakyanang mo-counterflow. Dili gayud tiaw ang usa ka bulan nga pagka-impound sa sakyanan. Kini ilabi na kon kada adlaw gayud nga gikinahanglan ang sakyanan.

Alang kanako, bisan pa man kon paghatag og dakong leksiyon ngadto sa mga bugok ug abusado nga mga motorista ang tuyo sa maong executive order, dili usab makatarunganon ang silot nga usa ka bulan nga impoundment sa mga sakyanan.

Dili lalim ang usa ka buwan nga impoundment. Alang sa mga negosyante, dako gayud ang ilang maalkanse sulod sa pipila ka semana nga pagkatingkagol sa ilang sakyanan. Siguro mas maayo nga padak-an na lang sa siyudad ang salapi nga fine alang sa mga mo-counterflow.

Maka-expect ang dakbayan nga adunay modangop sa korte aron pag-question sa maong executive order. Kini tungod lagi kay morag diniktador kini nga pamaagi. Usa pa, aduna na kita’y balaod kabahin niining maong problema apan kulang kini sa implementasyon dinhi sa dakbayan.