Kapoy na ang eleksiyon

Mao kuno kini ang sentimento sa katawhan bahin sa eleksiyon. Matud pa, “people are tired of elections.” May pagkatinuod, kay sa atong nasinati, kasagaran sa mga re-electionist ma-reelected gyud.

Kini, dili gumikan sa ilang katakus, kon dili, tungod kay anaa kanila ang gahum ug influence, ug labaw sa tanan, mas daghan sila’g kwarta kay sa mga tawo nga mo-challenge kanila nga bisan kon more qualified unta, apan, wa’y kwarta.

Dugang niini, ang atong eleksiyon gihimong palabwanay sa popularity, hinungdan nga gawas sa mga matarong ug maayo, daghan sa atong mga elected officials, bisan kon wala’y klaro nga baruganan ug plataporma panahon sa kampanya, modaog gyud gumikan sa pagka popular.

Unya, kining tanan, pakapinan pa sa rampant kaayo nga pinalitay og botos, nga inspite sa imong katakus ug kaligdong, kon wa kay igong kwarta nga ipamalit, dili ka gyud kadaog.

Mao kini ang hulagway sa atong eleksiyon dinhi sa atong nasud, maoy hinungdan nga ang mga alyado ni Presidente Digong Duterte miingon nga “people are tired of elections.”

Atubangan sa mga 4,000 ka village chiefs sa Calabarzon nga naglangkob sa mga lalawigan sa Cavite, Laguna, Batangas, Rizal ug Quezon, ang mga alyado ni Duterte namahayag nga adunay kahigayonan nga ma-postpone ang barangay ug mid-term elections kon mapahigayon na ang Charter change ug pag-shift ngadto sa Federal form of government.

Matud ni Rep. Reynaldo Umali sa Oriental Mindoro, ang pag-postpone sa elections, makahatag og taas nga panahon sa Kongreso pag-umol sa federal Constitution.

Mahinumdoman nga ang barangay ug ang SK elections sa Oktubre 2017 giuswag ngadto sa Mayo karong tuiga, ug ang referendum bahin sa bag-ong Constitution idungan sa barangay elections.

Lagmit mauswag na usab kining maong eleksiyon aron mo-concentrate na sa paghimo’g kausaban sa Batakang Balaod ug sa pagpahiluna sa Federalismo.

Ug lagmit matud pa, mauswag usab ang 2019 mid-term elections.

Lagmit kining pagduaw ni Duterte dinhi sa Sugbo karong Pebrero 12, nga makig-atubang siya sa mga local executives sa Visayas ug Mindanao, may kalabutan kini sa kampanya alang sa federalismo ug sa Cha-cha.

Matud ni Speaker Pantaleon Alvarez nga kining gihimo nga mga public consultations nagmatuod nga ang mga alyado sa Duterte administration, wala’y tinguha pag-railroad sa tinguha sa pag-amendar sa 1987 Constitution ug pag-shift ngadto sa federal system, kon dili, mag-agad sila sa general sentiment sa katawhan.

Hinaot nga mao kini ang mahitabo, nga ang kabubut-on gayud sa katawhan maoy mopatigbabaw, dili ang tinguha ug hidden agenda sa mga politiko.