Pangandam sa kalangay
Mogasto og P711 milyones ang 800 metros nga tunnel project nga pagahimuon diha sa UN Avenue sa dakbayan sa Mandaue ug kini gitakda nga sugdan sa ikaduhang kwarter karong tuiga.
Apan ang proyekto hayan nga dili madayon kay ang tsirman sa Regional Development Council (RDC) dinhi sa Central Visayas nga si Kenneth Cobonpue supak nga ipatuman kini dayon kay wala kini moagi og konsultasyon sa katawhan.
Si Cobonpue nagkanayon nga kinahanglang ihunong usa ang proyekto kay wala konsultaha sa Department of Public Works and Highways (DPWH) ang publiko, ug wala nila mahisgoti ang alternatibong rota nga adto moagi ang mga sakyanan nga apektado sa mao nga proyekto.
Kaniadtong Disyembre, ang DPWH mimando na sa BM Marketing nga nakabase sa dakbayan sa Tacloban nga mosugod na sa proyekto. Gani, ang parcellary survey alang niini gisugdan na sayo niining buwana, matud ni Engr. Faustino Dela Cruz Jr. nga maoy hepe sa DPWH-7 maintenance section atol sa miting sa Mactan-Cebu Bridge Management Board kaniadtong Enero 9.
Ang parcellary survey nga molanat og walo ka buwan himuon aron mailhan ang ‘road right of way’ ug uban nga mga dapit nga gikinahanglan nga gamiton sa kagamhanan aron mapalapdan ang dalan.
Ang tunnel project mosangko kini sa tiilan sa Marcelo Fernan Bridge ug aduna kini walo ka ‘lanes’ nga ang upat anha sa sentro para niadtong moagi sa taytayan, samtang ang laing upat ka lanes nga mahimutang sa taas mao kini ang service roads, tagduha kada kilid sa tunnel.
Ang duha ka ‘lanes’ sa habig sa tuo para kini sa mga sakyanan nga moagi sa UN Avenue pero ang mga motorista kinahanglan nga moliko sa dili pa moabot sa taytayan, dayon agi sa service roads.
- Latest