Hain na si Trillanes?

Asa na ang manok sa oposisyon nga si Senador Antonio Trillanes? Human sa makabungol niya’ng mga bunal batok sa administrasyong Duterte sa nakalabay nga mga bulan, hilum pa sa tirana ang senador niining mga unang bulan sa bag-o nga tuig.

Daghan ang nakuratan sa kalit nga pagpakahilum ni Trillanes mahitungod sa lab-as nga mga isyu batok sa administrasyon. Naanad na kita sa iyang sige og bunal ni Duterte sa panahong adunay isyu nga gikalambigitan ang presidente.

Gani, nahimo na nga pambato si Trillanes sa oposisyon gumikan sa iyang sige’g hapak og lapok ni Duterte sa mga alegasyon, sama sa gitago  nga ill-gotten wealth ug sa giingong kalambigitan sa presidente sa mga pagpatay didto sa Davao.

Sukad pa kini niadtong nagsingabot ang eleksiyon sa 2016.

Apan karon hilum pa sa tirana ang maong senador. Sama kini sa napanohotan paghapak sa hangin ug nga nagtikuko na lang sa suok didto sa hawanan sa Senado. Dili gayud malikayan sa katawhan nga makamatikod ug mangutana kon unsa na’y nahitabo sa maayong laking senador.

Nagpasabot ba kini nga nahutdan na og bala si Trillanes alang sa padayong opensiba niini batok ni Duterte?

O basin nagpundo lang kini og igong hangin aron dunay ikabuga sa panahon unya kon makakita kini og laing oportunidad pagpaghot pag-usab sa presidente.

Hinuon kadtong paghot ni Trillanes kang Duterte sa nakalabay’ng mga bulan, dili nato ikalimod nga adunay kolor politika.

Dili ba nga buhaton gayud sa oposisyon nga mabulit sa lapok ang administrasyon aron nga makabalos kini sa sunod eleksiyon?

Well, ato lang paaboton kon unsa man nga bomba nga pabuthon ni Trillanes batok sa presidente. Naghinamhinam na ako kon unsa na usab ang iyang iyagyag nga baho batok sa administrasyon, ilabina ning nagkaduol nga piniliay.

Hinuon, daghan ang nakamatikod nga puro pagarpar lang kining mga bira ni Trillanes batok ni Duterte.

Kini ang hinungdan ngano nga wala gayud mi-click ang iyang mga ratsada. Tingali, tungod kay daghan ang gihambugan sa iyang kalaki.