Silot sa mo-counterflow

Gimando ni Mayor Tomas Osmeña ang pag-impound sa mga sakyanan nga gimaneho sa mga driver nga masakpang mo-counterflow sa traffic.

Gisugdan dayon sa pagpanakop kadtong mga driver nga nasakpang mi-counterflow ug giisyuhan sila og traffic citation ticket aron pamultahon og P500.

Wala pa usa tanggonga ang kapin sa 60 ka sakyanan kay karon pa’ng semanaha iisyu sa mayor ang executive order nga magmando pag-impound sa mga sakyanan nga mo-counterflow. Wala’y storage fee. Ang kamandoan sa mayor gihimo human siya makadawat og daghang reklamo mahitungod sa mga sakyanan nga mag-counterflow nga makamugna og peligro sa mga sakyanan nga ilang ikasugat.

Suporta kaayo ko niining maong kamandoan ni Osmeña kay dili ikalimod nga pwerteng daghana gyud nga sakyanan nga ang driver mo-counterflow sa traffic, ilabi na kining mga motorsiklo, nga nagtuo tingali nga sila na maoy hari sa karsada.

Pero kon giaksiyonan man sa mayor ang reklamo batok sa mag-counterflow, mas maayo pud tingali nga iapil niya sa paghimo og hugtanay nga kampanya ug pamultahon ang mga driver, ug ipa-impound usab ang mga sakyanan nga magdagan sa karsada panahon sa gabii nga wala’y suga.

Daghan kaayo kini sila nga mga driver nga dili magsuga samtang magmaneho panahon sa gabii. Kanunay ko nga makasugat niining mga sakyanan nga dili magpasiga sa suga, ug sagad niini mga passenger jeepney, ang uban sab mga motorsiklo ug tricycle. Makapanguros na lang ta sa kakuyaw kay usahay mokalit lang og tunga sa atong atubangan. Usahay magtuo na lang ta nga giabat, o gi-ungo, pero sakyanan diay nga wala’y suga.

Kay gabii man ug kaadlawon ang akong biyahi kada adlaw tungod sa akong programa sa radyo, mao ni ang kanunay nako nga masugatan. Mao nga manghinaot ko nga apilon pud kini sa pagtagad sa taga CITOM.