Komedya sa House Speaker

Gihulga ni House Speaker Pantaleon Alvarez ang mga sakop sa Kongreso nga wala’y budget nga madawat ang distrito sa kongresista nga dili mosuporta sa giduso nga Constituent Assembly alang sa pag-usab sa batakang balaod. Apan human makasugat og mga pagsaway sa iyang laraw, si Alvarez miingon nga nagkomedya lang siya.

Nabulgar nga adunay uyab si Alvarez bisan og aduna na siya’y asawa. Nabulgar usab nga adunay uyab ang iyang higala nga kongresista. Ang mga tago nga relasyon ni Alvarez ug suod niyang higala, nabulgar human nga nag-away ang ilang mga uyab. Kay ang ilang mga uyab nag- away, nag-away pud si Speaker ug ang amigo niyang kongresista.

Tungod sa nabulgar nga tinago untang relasyon sa Speaker, gihulga siya sa iyang mga kritiko nga pahukasan sa iyang lisensiya sa pagka abogado. Pero ang hulga iyang gisugat og hagit, nga tinud-on ang pagpakanselar sa iyang lisensiya sa pagka abogado tungod lang sa uyab kay tan-awon kuno niya og may mahibilin pa ba nga abogado.

Ambot makonsiderar ba pud ni nato nga laing komedya ni Speaker Alvarez? Tungod ning maong pamahayag, mireklamo ang ubang mga abogado kay nganong idamay man sila ni Alvarez.

Ang hulga ni Alvarez sa dili paghatag og budget sa mga kongresista nga dili mosuporta sa Constituent Assembly, o paglaslas sa budget, dili bag-o kay iya pud kining gihimo sa Commission on Human Rights diin iya lang kining gigahinan og P1,000 alang sa usa ka tuig niining operasyon lukop nasud.

Apan dihang wala kini suportahi sa mga senador, iya kining gibakwi. Niining maong kontrobersiya, wa moingon si Alvarez nga nagkomedya siya pero kon imo nga sabton mura siya’g nagkomedya, seryuso lang hinuon nga komedya.

Karon pa diay ko niining Alvarez, seryuso ang komedya. Pero, komedya ra kaha ni sa Speaker? o palusot na lang, kay naapiki sa rason?