Pagbaton og cellphone katungod dili privilege

Gituman gayud sa kapolisan ang ilang lakang pagputol sa signal sa cellphone isip kabahin sa ilang pagpahugot sa siguridad alang sa tinuig nga Fiesta Señor, ilabina atol sa Sinulog Festival, sa dakbayan sa Sugbo.

Apan daghan usab ang nag-alburoto niini. Bagulbol dinhi, bagulbol didto tungod kay sa pipila ka oras nga dili sila katawag o ka-text o ka-internet sa ilang cellphone. Klaro nga napuwerhisyo sila pagkawagtang sa signal.

Usa ako sa liboan nga nahasol usab sa maong lakang sa kapolisan pagsira sa mga cell site. Tiaw mo na kadtong mga text message nga dinalian unta nga tubagon pipila ka oras pa nako nadawat, pagbalik na sa signal.

Usa ka abogado nga magsisibya sa radio ang miingon nga ang paggamit sa komunikasyon, lakip na ang mga signal sa cellphone, kabahin kini sa privilege nga gihatag sa gobiyerno sa katawhan. Ug mahimo kuno nga bawion kini nga privilege sa kagamhanan.

Apan angay lamang nga usbon na kanang maong palisiya sa kagamhanan tungod kay lahi na ang panahon karon. Ang paggamit sa cellphone ug ubang matang sa komunikasyon, lakip na ang signal niini, dili na matawag nga privilege.

Tungod lagi sa dakong panginahanglanon sa katawhan niini karong panahona, usa na gayud ka necessity ang paggamit og cellphone, lakip na ang teknolohiya sa internet.

Alang kanako, dako kaayo ang kalainan sa privilege ug necessity.

Ang pagabaton og privilege mao kanang sama sa imong pagmaneho sa sakyanan. Di ba nga dili tanan ang tugotan sa kagamhanan nga maka-drive og sakyanan sa kadalanan? Mao gani nga molukat ka og lisensiya aron aduna kay privilege nga maka-drive.

Apan klaro nga lahi ang paggamit sa cellphone karong panahona. Tungod sa dakong demand niini sa katawhan gumikan sa inadlaw nga panginahanglanon sa komunikasyon, dili na matawag nga usa ka privilege ang pagbaton niini.

Dinhi sa Pilipinas halos matag usa adunay cellphone. Ug ang paggamit niini dili usa ka privilege kondili kabahin na sa atong tawhanong katungod. Mao gani nga sayon na lamang ang atong pagpalit og SIM card sa tindahan tungod kay ang komunikasyon - text o tawag o paggamit sa internet - kabahin na sa inadlaw nga demand sa atong kinabuhi.