Ang TRAIN ni Duterte

Gipadagan na ni Presidente Rodrigo Duterte ang iyang TRAIN (Tax Reform Acceleration and Inclusion ) sugod ning buwana. Ang problema lang kay mahal ang plete niini kay ang epekto sa TRAIN mao man ang pagtaas sa presyo sa mga palaliton. Ang TRAIN mipatong og taas nga buhis sa mga produktong petrolyo ingon man sa mga produktong tam-is sama sa softdrinks ug kape.

Ang train nga gipasakyan ni Presidente Duterte sa iyang katawhan naghatag og bentaha ug disbentaha, kay samtang nagbilin kini og daku-dako nga “take home pay” sa mga adunay trabaho, mipataas pud kini sa presyo sa mga palaliton. Busa ang daghan nga mga wala’y trabaho mao ang labing maapektohan.

Kay nasayod nga ang TRAIN dako gayud og epekto sa mga kabus, ang gobiyerno mohatag kanila og P200 nga tabang matag buwan sa matag sakop sa pamilya niining tuig 2018, unya P300 sa tuig 2019 ug P400 sa tuig 2020.

Laing bentaha sa TRAIN mao nga ang mga mahiligon sa tam-is magkontrolar na sa ilang kaugalingon sa pag-inom ug pagkaon og ilimnon, ingon man pagkaon nga tam-is, aron sila makadaginot ug aron dili sila magka diabetes.

Duha ang tumong sa TRAIN ni Presidente Duterte ug kini mao ang pagtigum og buhis, ug pagkontrolar sa himuon sa iyang katawhan. Magtigum ang gobiyerno ni Presidente Duterte og dakong salapi aron aduna kini igong pundo nga makasugakod sa gidoble na nga suweldo sa mga sundawo, polis ug mga jail officers.

Kinahanglan gayud nga patas-an ang buhis sa mga produktong petrolyo ug tam-is aron makatapak kini sa dakong kantidad sa salapi nga mahanaw sa gobiyerno tungod sa pagwagtang na sa withholding tax sa  mga nagsweldo lang og wala molapas sa P250 mil ang tuig. Sa kinatibuk-an, kon makaayo ba o dili sa katawhan ang TRAIN ni Presidente Duterte, mao ni ang atong atangan.