Dili maayo nga desisyon

Tulin pa sa alas kwatro nga nakahimo og aksiyon ang kagamhanang lokal sa dakbayan sa Sugbo sa pagkandado una sa mga aplikasyon alang sa pagtukod og mga high-rise nga building sa siyudad. Kini human usab sa pagkasunog sa usa ka department store sulod sa usa ka mall.

Matud pa ni Mayor Tomas Osmeña nga hunongon una sa City Hall ang pag-isyu og permit alang sa pagtukod og mga high-rise nga building sa dakbayan hangtud nga makahatag usab ang mga developer og igong assurance sa ka-safe sa ilang proyekto.

Gani nagplano ang mayor nga magpatawag siya og meeting uban sa mga developer sa dakbayan aron pagtino kon unsa nga mga lakang ang ilang buhaton aron nga malikayan ang susama nga trahedya nga miigo sa Metro Ayala department store sa niaging semana.

Apan hinaot nga dili na gayud i-ban sa lokal nga kagamhanan ang pagtukod og mga high-rise building sa siyudad. Dili kana maayo nga desisyon tungod kay dako unya ang alkanse sa dakbayan niini nga lakang. Ambot ngano nga nahunahunaan man kini sa kadagkoan ning siyudad.

Mao na ang trend karon sa sektor sa real estate ang pagtukod og mga high-rise building dili lang sa dakbayan sa Sugbo, kon dili, sa ubang lugar usab sa Metro Cebu. Usa kini sa labing misulbong nga sanga sa business sector dinhi nga mopadayon pa sa umaabot nga mga dekada.

Usa sa rason ngano nga mora’g uhong nga misulbong ang mga high-rise condominium ug mga office building sa dakbayan sa Sugbo ang kagamay sa luna nga mabungkal sa property sektor. Mao na nga wala na’y laing opsiyon ang mga developers, kondili, ang pagpataas sa ilang mga building.

Mao na kana ang reyalidad karon, ug dili na gayud kapugngan pa ang pag-arangkada sa mga high-rise buildings sa dakbayan gumikan usab sa dakong demand tungod sa nagsaka nga bul-og sa investments. Mao na nga dili maayo ang desisyon sa City Hall pag-ban unya sa konstruksiyon sa mga high-rise building.

Ang angay unta nga buhaton sa kagamhanan sa dakbayan mao ang paghingusog sa lakang pag-monitor niadtong mga establisimento sa dakbayan kabahin sa siguridad nga ilang gipatuman sa ilang mga edipisyo.

Kini aron kalikayan ang susama nga panghitabo sa niaging semana. Usa pa, angay na gayud nga mohangop ang Bureau of Fire Protection ug ang kagamhanan sa siyudad sa mga modernong kahimanan sa atong mga bombero.

Kinahanglan nga himuon nila kini nga prayoridad. Hinaot nga nakat-on na sila og maayong leksiyon sa nahitabo sa nilabay nga trahedya sa sunog.