Angay nga respetohan

Miani og nagkalainlaing reaksiyon ang pamahayag ni Presidente Rodrigo Duterte nga suportado niya ang lakang pagtugot sa same-sex marriage dinhi sa Pilipinas nga hagbay ra nga giduso sa mga miyembro sa lesbian, gay, bisexual, and transgender (LGBT) community.

Daghan ang miyam-id niini tungod lagi kay sukwahi kini sa pagtulon-an sa simbahang Katoliko. Nahibalo na kita nga mayoridad sa katawhan ning atong nasud mga Katoliko, ug sigurado gayud nga gamiton sa simbahan ang inpluwensiya niini batok sa maong lakang.

May House bill na nga gipasaka si Speaker Pantaleon Alvarez nga nagtugot sa civil partnership sa mga same-sex couples. Ambot kon kanus-a kini mapasar sa Kongreso. Hinuon, nakasiguro ko nga mag-agni kini og init nga diskusyon sulod sa Ubos Balay Balauranan.

Kini ilabi na kon molihok na ang inpluwensiya sa Simbahang Katoliko ug molapdos sa mga magbabalaod sa dili pagsuporta sa maong bill.

Apan mipadayag na og suporta si Duterte niini, ug nga adunay dako nga tsansa nga mapasar gayud kini sa Kongreso sa katapusan.

Sa ubang bahin sa kalibutan, ilabi na didto sa mga Western countries, hagbay ra nga gi-recognized ang same-sex marriage. Kabahin kini sa ilang tawhanong katungod.

Usa sa mga ilado nga personalidad nga mi-avail niini mao ang singer nga si Elton John kinsa naminyo kang David Furnish didto sa England pipila ka tuig na ang nakalabay.

Apan dakong pangutana karon kon magsilbi ba ang maong balaodnon dinhi sa Pilipinas gumikan lagi sa dako nga inpluwensiya sa simbahang Katoliko nga siguradong buhaton gayud ang tanan aron nga dili gayud kini mapasar sa Kongreso.

Sa laing bahin, adunay katungod usab ang mga sakop sa LGBT community nga moduso sa same-sex marriage.

Katungod sa usa ka sakop sa third gender nga ma-legalized ang union uban sa iyang hinigugma aron nga sayon unya ang pag-acceptar sa komunidad.

Tawo ra usab sila ug angay nga respetohan ang ilang katungod.

Ania na kita sa modernong panahon diin dili na ikatingala pa ang partnership sa duha ka pareho og gender, bisan pa man kon sukwahi kini sa atong tinuohan ug tradisyon.