Kulang sa kaalam sa pagpangandam

Sa akong pagsulat niini, padayon ang pagkusokuso sa bagyong Urduja dinhi sa tungatungang bahin sa nasud. Base sa mga report, daghan na kuno ang namatay ug na-missing tungod sa mga pagbaha ug pagdahili sa yuta gumikan sa wala’y hunong nga pag-ulan.

Dili kaayo kusog si Urduja. Normal lang kini nga bagyo, dili sama niadtong mabangis nga Yolanda nga mihapak sa nasud ug mikalas og daghang kinabuhi.

Apan tungod sa kahinay sa pag-irog niini uban sa kusog nga pag-ulan, gipaabot nga dako ang kadaot nga dala niini.

Sama sa naandan, dako ang kadaot basta motadlas na gani ang bagyo sa nasud. Kini resulta usab sa kakulang sa kaandam ug kaalam sa mga molupyo mahitungod kon unsay angay buhaton matag lapdos sa mao nga klase sa kalamidad.

Tungod lagi kay ania kita sa ganghaan sa Pasipiko, hagbay ra nga agianan og bagyo ang atong nasud. Wala pa natawo si Kristo Hesus, nagsige na og panagang ang atong mga katigulangan matag hapak niining mao nga katalagman.

Apan hangtud karon, hinay ang atong kaalam kon ang pagpanagang sa maong kalamidad ang hisgotan. Adunay mga emergency drill nga kanunay’ng gipatuman sa kagamhanan ug sa pribado nga sektor mahitungod sa tukma nga pagpangandam panahon sa katalagman.

Hinuon mora’g sa mga estudyante ug mga nagtrabaho sa gobiyerno ug pribadong sektor ra kini gipahigayon.

Kini ilabi na mahitungod sa pagpangandam kon adunay dakong linog ug sunog sa mga eskuwelahan, opisina ug ubang mga establisemento.

Sa akong nakita, menos kaayo ang pagpahigayon og mga typhoon drill sa komunidad, ilabi na niadtong mga lugar diin kasagaran mohapak ang mga bagyo.

Regular unta kini nga ipatuman sa kagamhanan aron nga makabaton og kaalam ang katawhan kon unsa ang angay buhaton panahon sa bagyo.

Matag tuig, dili momenos 15 ka bagyo ang mohapak sa atong nasud, hinungdan nga ang Pilipinas maoy labing kastiguhon matag tuig. Bisan pa man niini, kulang sa kinaadman ang kinabag-an mahitungod sa unsay angay nga buhaton aron mapugngan ang pagkalas sa mga kinabuhi.