Palpak nga bakuna
Hilabihan kadako niining kontrobersiya sa bakuna batok sa dengue nga gipatuman sa kagamhanan ngadto sa kabataan sa tibuok nasud.
Dili man kuno kini maayong ituslok ngadto sa mga bata nga wala pa matapti sa maong virus.
Nagkapuliki na karon ang Department of Health pagpalong sa kabalaka sa mga ginikanan. Kini ilabi na nga gatusan na ka libo ka kabataan sa nasud ang nabakunahan na sa Dengvaxia, ang kontrobersiyal nga bakuna sa dengue.
Miadmiter na ang Sanofi Pasteur, ang tigbuhat sa maong bakuna, nga dili angay ituslok ang Dengvaxia ngadto sa mga bata nga wala pa maigo sa dengue virus.
Kini gumikan kay kuyaw unya kon grabe na hinuon ang sitwasyon niadtong mga nabakunahan kon mataptan unya sila sa dengue virus.
Apan ulahi na ang pamahayag sa Sanofi. Gatusan na ka libo ang natuslokan sa maong bakuna sa tibuok nasud. Karon nameligro ang kahimtang niadtong mga bata nga nabakunahan na apan wala pa natapti sa dengue virus.
Dili nato mabasol kon daghan sa mga ginikanan ang nag-alburoto karon. Kinsa ang ilang mabasol niini?
Tingali, daghang mga tudlo ang nagpunting karon sa DOH tungod sa kapalpak niini pagpahibalo sa katawhan mahitungod sa risgo sa paggamit sa maong bakuna.
Apan siyaro man usab kon wala makahibalo ang DOH sa limitasyon sa maong bakuna. Imposible kon wala kini pahibaw-a daan sa manufacturer sa Dengvaxia. Kinsay angay mabasol niining maong kontrobersiya nga nakabutang karon sa peligro sa liboan ka kinabuhi?
Kon ato nga hunahunaon, angay lang nga mahasngan niini ang kagamhanan sa Pilipinas ug ang langyaw’ng manufacturer sa maong bakuna. Kini tungod kay wala nila mapahibalo daan ang side effects sa Dengvaxia niadtong wala pa kini mabakuna sa kabataan.
Kinahanglan gayud sila nga manubag tungod sa maong lapso. Nahimutang gayud sa dakong peligro sa risgo sa side effects niini kadtong kabataan nga nakabenepisyo na sa maong bakuna.
Lisod hunahunaon nga ang bakuna alang unta batok sa makamatay nga dengue, apan mao na hinuon ang magduso kanila ngadto sa kaalaotan.
- Latest