Mapahimuslanon nga drayber

Kudos ngadto sa Land Transportation Franchising and Regulatory Board tungod sa dali niini nga pag-aksiyon sa usa ka post nga nag-viral karon sa Facebook mahitungod sa usa ka taxi drayber nga hilabihan ka dako sa plite nga gipangayo sa iyang pasahero nga mga turista.

Tiaw mo ba nga P2,000 ang pangayo sa kanahan sa iyang mga pasaherong langyaw gikan sa Shangri-La Mactan ngadto sa SM Seaside. Nangugat na og hangyo ang mga pasahero nga paubsan ngadto sa P600 ang plite, apan hunit pa sa kusahos ang maong drayber.

Sa hearing nga gipahigayon sa LTFRB, napamatud-an gayud nga klaro ang pagpahimulos sa drayber sa taksi sa iyang mga pasaherong Hapon. Kini ang hinungdan nga gipahamtangan kini og multa sa ahensiya. Apan wala’y swerte usab ang iyang operator kay nadamay ug naapil sa multa.

Mibisita sa Cebu ang maong mga Hapon kay ari lagi mag-honeymoon human sa ilang kasal. Apan maayong pagkaguba sa ilang malipayon unta nga pagbisita gumikan niining oportunista ug hakog nga drayber sa taksi kinsa grabe nga nakapangilkil.

Sukad pa kaniadto, sa wala pa midagsa ang liboan ka Koreano dinhi aron pagtuon og Iningles, paborito na nga bisitahon ang Sugbo sa mga Hapon. Gani, daghan nga Japanese restaurants ang nanurok dinhi aron pag-cater usab mga turistang Hapon ug uban pa.

Apan sa pagsulbong sa gidaghanon sa mga turista dinhi, migara usab kining mga drayber sa taksi mga mapahimuslanon. Daghan na nga mga reklamo mahitungod sa mga langyaw’ng turista kinsa gihimulbolan sa mga drayber sa taksi.

Dako kaayo kini og epekto sa imahe sa Sugbo, ilabi na sa industriya sa turismo. Daghan na hinuong mga langyaw ang dili na ganahan nga mobisita dinhi tungod lagi niining wala’y disiplina nga mga drayber nga grabe nga mopahimulos sa panahon.

Panahon na nga pakusgan sa kagamhanan ang paggukod niining mga badlungon nga drayber sa taksi. Adunay daghan diha nga nagkatap ug nagsige og pamiktima og pasahero pinaagi sa pagpaburot sa plite. Angay lang nga maleksiyon sila sa ilang mga binuang.