Dili kaya sa PDEA

Angay usab nga hingusgan sa Philippine Drug Enforcement Agency ang paggukod nidtong nalambigit sa negosyo sa ilegal nga druga. Kini human usab nga gisangon niini’ng mao’ng ahensiya ang tanan nga obligasyon batok sa druga.

Sa ako nga nakita, mura’g menos ug dili paspas ang operasyon sa PDEA-7 karong panahona ikumpara sa trabaho sa kapolisan kaniadto sa dihang kugi pa sila sa paggugod niadtong nalambigit sa ilegal nga druga.

Tungod siguro kini sa dako nga kakulangon sa maong ahensiya og mga operatiba dinhi sa Central Visayas. Tiaw mo ba nga sama lang ang gidaghanon sa mga operatiba sa PDEA sa tibuok rehiyon sa usa ka estasyon sa polis.

Hinuon, expected usab nga maayo gayud ang performance sa kapolisan sa kampanya batok sa ilegal nga druga. Gawas nga daghan ang Philippine National Police og mga operatiba, mas sangkap usab ang kapolisan sa kahimanan.

Maayo na unta ang dagan sa krusada batok sa druga sa administrasyon ni Duterte tungod usab sa kapolisan, kinsa adunay dako nga natabang sa PDEA. Daghan ang natiklo ug misurender tungod sa gipakusgan nga operasyon. Apan tungod usab sa sunodsunod nga mga kontrobersiya nga mihapak sa kapolisan sa ilang mga operasyon mao nga napugos si Presidente Duterte paghunong sa partisipasyon sa PNP sa gubat batok sa druga.

Ako maoy gisayangan niining mao nga kalamboan. Kini tungod lagi kay nasayang gayud ang dakong momentum nga naani sa kagamhanan gumikan sa pagbiya sa kapolisan gikan sa kampanya batok sa ilegal nga druga.

Sa ako nga pangagpas, dili gayud magmadaugon ang PDEA sa gubat batok druga. Kulang kini sa resources - operatiba ug kahimanan - paggukod niadtong mga bigtime drug dealers, ug nagkinabanglan kini og dako nga tabang sa ubang ahensiya sa gobiyerno.