Wala’y ikaayo sa dakbayan

Gusto na usab sa kagamhanan sa dakbayan sa Sugbo nga mo-loan og dako nga kantidad aron nga igasto sa pagmugna og nagkalainlaing proyekto, sama sa pag-improve sa sistema sa drainage.

Bisan pa sa pagbabag sa ubang konsehal sa oposisyon, giaprobahan sa Konseho sa dakbayan ang resolusyon nga nagtugot kang Mayor Tomas Osmeña pag-loan sa Landbank of the Philippines alang sa maong mga proyekto.

Kumbinsido gayud si Mayor Osmeña nga dali ra nga mabayran sa siyudad ang loan sa bangko nga mokantidad og P3 bilyones. Kini kon mohalin na kuno ang dakbayan og porsiyon sa South Road Properties nga buot ibaligya niini.

Apan ang problema mao nga wala pa moarangkada ang lakang pagbaligya sa maong mga lote. Sa kantidad nga dili momenos sa P110,000 matag metro-kuwadrado, dako ang pagtuo ni Osmeña nga daghan ang mokubit sa tanyag.

Apan kon wala’y interesado pagpalit sa maong mga lote tungod sa dako’ng presyo niini, asa na man unya mangukay og salapi ang dakbayan alang sa bayad sa maong loan? Basin kon dugang palas-anon na usab kini alang sa mga Sugboanon.

Aduna na unta’y dako nga pundo ang dakbayan nunot sa pagbaligya sa nakalabay nga admistrasyon sa pipila ka luna sa SRP ngadto sa Ayala, Filinvest ug SM. Apan gidiskase man hinuon kini sa administrasyon ni Osmeña.

Karon sugod na usab sa uno ang lakang sa siyudad pagdani og mga mamumuhonan sa SRP. Nag-anunsiyo ang lokal nga kagamhanan nga may interesado pagbubo og puhonan. Apan wala pa kita makakita sa kolor sa kwarta gikan niini’ng mga negosyante.

Mao kini ang nakaparat niini’ng atong mga opisyal sa dakbayan. Nagsige lang og banghag kini’ng matag partido nga wala gayu’y ikaayo sa mga molupyo. Kon gipadayon pa unta kadtong deal uban sa tulo ka mamumuhonan, dako na unta og ikatabang ang salapi ngadto sa dakbayan.