Patitulohan ang portion sa yuta nga paliton

Dear Atty. Divine,

Dunay ko’y yuta nga paliton, apan portion lang. Titulado ning yutaa ug plano unta nako nga tukuran og balay. Ang akong pangutana kon mahimo ba nako nga mapatitulohan ang portion nga akong paliton?

Unsa’y dokumento nga angayan nako nga pangayuon sa tag-iya ini’g bayad nako sa yuta? Unsa’y akong buhaton aron kini mapatitulohan? Daghang salamat.-Weng

* * *

Dear Weng,

Yes, mahimo nga imong patitulohan ang portion nga paliton nimo. Apan kinahanglan nimo kini nga ipa-survey aron pag-identify sa portion nga imong paliton ug dayon imo kining ipa-subdivide. Ang surveyor mao na’y mohimo sa subdivision plan ug mopa-approve niini ngadto sa DENR.

Once nga naa na kay approved subdivision plan, mao kini ang imong ilakip sa pag-submit sa Register of Deeds uban sa iyang technical description ug sa imong request nga magpa-issue ka og title sa portion nga imong napalit.

Apan sa dili pa ni nimo buhaton, inigbinayranay ninyo sa tag-iya, magpirmahanay mo og Deed of Absolute Sale sa portion nga imong napalit ug dayon panotaryuhan nimo ang maong dokumento.

Ang imong pangayuon sa tag-iya mao ang certified true copy sa title, certified true copy sa tax dec ug tax clearance, dayon imong i-process ang pagbayad sa Capital Gains Tax ug Documentary Stamp Tax ngadto sa BIR.

Once nga mogawas na ang Certificate Authorizing Registration from BIR, imo kining i-submit sa Register of Deeds uban sa approved subdivision plan nga akong gihisgutan sa unahan ug ang original copy sa title, so duha na unya ang mogawas nga titulo, ang usa ka titulo mabutang na sa imong pangalan ang portion nga imong napalit, ug ang ikaduha nga title mao ang nahibilin sa yuta nga makapangalan gihapon kini sa seller. -Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.