Wala na’y karaang PUJ sa 2018?

Gipahibalo ni Presidente Rodrigo Duterte ngadto sa grupo nga PISTON nga ini’g entrada gayud sa tuig 2018, wad-on na sa hingpit ang tanang karaang dyip pasaheroan sa karsada.

Kini tungod kay matud pa ni Tatay Digong, ang maong mga sakyanan nagbuga og makadaot nga aso, nga kon mahingos sa katawhan magdala kini og sakit sa baga, labi na panahon nga matrapik og dugay ang mga sakyanan sa dalan. Nindot ang tumong sa presidente kay nagpakita’g pagmahal sa katawhan. Apan ngadto sa mga operator ug drayber nga maigo niining iyang balaod, makaingon kaha sila nga gimahal pud sila sa atong pangulo? Dili kaha dismantolon na lang sa mga operator ang ilang karaang dyip aron may kuwartang mabalik sa ilang dakong puhonan nga gibubo sa maong negosyo? Ang mga drayber, asa na man lang ibutang? Dili kaha sila makulban og kaldero ug manghamoy na lang sa tudlo? Sagad ra ba sa mga drayber, sweet lover. Gawas sa daghang anak sa tinuod nilang asawa nga gibuhi, may lain pa nga sayidlayen nga gigastohan. Asa na man lang sila’g kuwarta nga ipalit sa inadlaw’ng panginahanglan? Sa allowance sa ilang mga estudyante? Sa bayranan sa eskuylahan? Nakita ba kaha kini ni Tatay Digong no? Nindot unta, nga kadtong mga drayber nga wala na unya’y kadrayban nga dyip pag-abot sa Bag-ong Tuig 2018, kahatagan sa gobiyerno og laing kapanginabuhian, dili kay pasagdan lang nga maalaot. Gobiyerno man ang nakapatakilid sa ilang pamuyo, angay nga gobiyerno sab ang motabang pagpabarug nilag balik.

Hinuon, dili tanang drayber buotan. Ubay-ubay ang mga badlungon – ang kawala g’yuy respeto sa Road Courtesy and Discipline. Mohunong sa tunga kay mamik-ap og pasahero. Mopadagan bisan og Red Light pa. Mopabuhot og sigarilyo samtang nagdrayeb, ug daghan pa. Tingale, panahon na nga kining mga badlungong drayber madisiplina na. Sila ang angay nga dili na g’yud padraybon kay nakahatag og dugang kahasol sa karsada. Pero kadtong mga buotan, aw, intawon Tatay Digong, ayaw sila’g pasagdi.

Sila ang matang sa tawo nga maayong padaghanon. Dili ba matud mo panahon sa eleksiyon: “Change is coming,” Busa, karon nga presidente ka na, ipakita kuno nga ang Change is here.