Duha ka dagway sa NBA
Samtang nagkainit ang playoffs sa NBA nga, bisan sa kahigpit sa panagribal, gihulagway nga hanig lang sa ikatulong sunudsunod nga panag-abot sa Finals sa Cleveland Cavaliers ug Golden State Warriors, gilingi sa mga eksperto sa basketball ang duha ka managlahi nga mga haligi sa mabulukong kasaysayan sa NBA:
Ang gipakauwawan nga responsable sa labing dagkong kapakyasan sa NBA draft; ug
Ang gipasidunggan nga labing maayong basketbolista sa kasaysayan.
* * *
Si Stu Inman, tagduma sa Portland Trailblazers, ang gibasol sa duha ka labing laksot nga trahedya sa NBA draft:
Niadtong 1972, iyang gipili ang sentro nga si LaRue Martin nga napakyas sa pagdominar sa NBA ug gilaktawan ang umaabot nga superstars nga silang Bob McAdoo ug Julius “Dr. J” Erving; ug
Niadtong 1984, iyang gipili ang laing sentro nga si Sam Bowie nga napamatud-ang di diay kamao moduwa ug gilaktawan ang umaabot nga superstars nga silang Michael Jordan, ang labing maayong magduduwa sa tibuok kalibotan, Charles Barkley ug John Stockton.
* * *
Nipilit ang kauwawan ni Inman bisan nabawi niya sa NBA draft sa 1974 dihang iyang gikuha ang laing sentro nga si Bill Walton. Sa 1976-1977 season, si Walton ang nangu sa kampeyonato sa Blazers batok sa 76ers nga gipangulohan ni Dr. J.
Si Walton ang Finals MVP ug pagka sunod tuig nahimong NBA MVP. Human niretiro, si Walton naapil sa Basketball Hall of Fame ug gipasidunggan nga usa sa 50 ka labing bantogang magduduwa sa NBA. Apan si Inman padayong giisip nga nagpataka.
* * *
Nanakod ang demalas ni Inman dihang nahimong tagduma si Jordan sa NBA teams. Isip presidente sa Washington Wizards niadtong 2001, iyang gipili si Kwame Brown inay silang Tyson Chandler ug Pau Gasol. Dihang nibalik pagduwa, giinsulto ni Jordan si Brown tungod sa pagpakauwaw niya.
Pagka 2010, gikuha si Brown sa Charlotte Bobcats nga ang bag-ong tag-iya, nakatag-an ka, mao si Jordan. Ambot ganahan ba lang momatuod nga husto sa labing una niyang gipili nga si Brown. Suod nga higala ni Jordan nga si Barkley niingon nga ang buslot sa pagpanag-iya ni Jordan sa Bobcats mao ang kakuwang og mga kaabag nga isog nga molalis sa sayop niyang mga desisyon.
* * *
- Latest
