Pagbarato sa lana
Padayong nitibugsok ang prisyo sa lana sa merkado sa kalibutan, nga gipaabot nga musangpot sa laing dakong us-os sa prisyo sa krudo ug gasolina sa Sugbo ug sa Pilipinas karong Martes, nga maoy nasabotan nga adlaw sa pagpatuman sa sinemana nga kausaban sa lokal nga prisyo sa lana.
Nitugsad ang prisyo sa lana sa labing ubos nga ang-ang sukad niadtong Nobiyembre 29, usa ka adlaw sa wa pa maumol ang kauyonan sa Organization of Petroleum Exporting Countries (OPEC) paglaslas sa ilang produksiyon. Ang saad pagsulbad sa subra nga kalibutanong suplay sa lana nisangpot sa pagsulbong sa prisyo sa niaging lima ka buwan.
* * *
Ang laslas sa produksiyon nga gisugdan niadtong Enero, nga maoy labing una nga gipatuman sa OPEC sukad sa 2008, nakapabuhi sa dugo sa mga nakabubo og puhonan pinasikad sa pagsalig sa mas mahal nga prisyo sa lana.
Nisamot ang pagsalig nga nahuman na ang dul-an sa duha ka tuig nga pagtibugsok sa prisyo tungod sa pasalig sa Russia ug ubang non-OPEC countries nga laslasan sab ang ilang produksiyon. Mas nilig-on ang pagtuo nga makabawi na ang lana diha nga ang OPEC ug non-OPEC countries nipakita og abundang timaan pagtuman sa ilang kasabutan.
* * *
Apan nibalik og lugapak ang prisyo sa lana tungod sa kapaspas sa shale oil producers sa Estados Unidos, ginamit ang labing bag-ong mga teknolohiya ug mas madaginuton nga sistema sa produksiyon, sa pagpabaha og dugang suplay. Ang posibleng pagbalik sa Estados Unidos ug pamaligya og lana sa ubang kanasuran makahulga sa cartel ug ubang tradisyonal nga oil producers.
Wa sab makatabang sa kawsa pagpaburot sa prisyo sa lana ang padayong pagtidlum sa kalibutanong demanda sa gasolina ug sa wa mahinayon nga pangagpas sa pagsaka sa demanda sa China ug India.
* * *
Laing mga hulga sa lana: Ang pagsulbong sa produksiyon gikan sa Libya ug Nigeria, nga pulos wa maapil sa kauyonan sa OPEC, ug ang baruganan sa Russia nga dili na molaslas sa produksiyon sa ikaduhang tunga karong tuiga.
Gipaabot nga tukion sa tigum sa OPEC karong Mayo 25 ang padayong paglaslas sa produksiyon hangtod sa Septiyembre. Ang dakong tidlum sa prisyo mahimong makapugos sa OPEC pag-inat sa laslas hangtod sa sunod tuig.
* * *
- Latest