Kamabulukon sa abogasiya
Usa sa labing bantogang abogado sa Sugbo, si anhing Geronimo “Boy” Creer Jr., dunay dakong problema sa unang adlaw sa iyang Bar exam: Nakalimot siya sa iyang ngalan. Niginhawa siya og lawom, hugot nga nipiyong sa iyang mata ug naningkamot paghinumdom sa iyang ngalan.
Nisamot ang kalisang niya pagbuka sa iyang mata nga nakit-ang nakabuylo na ang iyang mga katapad sa pagtubag sa mga pangutana. Wa na makapugong sa iyang kaugalingon. Nibarug, nigawas sa classroom, nidagan ug nisiyagit sa tanang classrooms nga iyang nalabyan: “Kinsa man ko!? Unsa may akong nga’n!?”
* * *
Sa kapulihay, nahinumdoman ni Creer ang iyang nga’n. Nakapasar siya sa Bar. Nahimong usa sa labing malampusong abogado sa Sugbo. Nakahupot sa pipila sa labing kontrobersiyal nga mga kaso.
Sa kinapungkayan sa iyang abogasiya, gipatawag ko sa iyang law office sa downtown area sa Dakbayan sa Sugbo nga pila ra ka metro gikan sa among sibyaanan. Lawom nga gabii na ko niyang gibuhian. Apan gipadad-an og yellow pad nga iyang gipasalig nga magbugkos niya sa pasalig:
Iyang abagahon ang tanang gasto sa akong Bar. Labaw sa tanan, wa malimot pagpirma sa kumpleto niyang ngalan.
* * *
Ni-eskuyla gyud ko og abogasiya. Dili tungod sa iyang pasalig, kon dili, aron pagpalawom sa akong pagsabot sa mga balaod. Apan tungod sa mga oras sa akong trabaho, nga ang mga programa sa sayong buntag ug dayong tungang gabii gitaliwad-an sa tibuok adlaw nga paghipos sa mga balita, wa ko makalahutay.
Gawas sa kaikog sa naggasto sa akong pag-eskuyla, ang pasalig ni Creer nakapasamot sa kalisud sa akong hukom paghunong pagtahan sa abogasiya.
* * *
Pila ka buwan human sa akong paghunong, gipatay si Creer sulod sa iyang law office. Ang suspetsado gilambigit sa kapolisan sa usa sa iyang mga kaso. Napriso dayon ang suspetsado ug, sama sa ubang mga kaso, wa na’y nagsubay sa sunod nga mga panghitabo. Human sa 11 ka tuig napatay ang suspetsado sa gidudahang vigilantes.
Karong bag-o, naukayan sa akong asawa ang yellow pad nga pirmado ni Creer. Nalab-as namo ang kabililhon sa mga saad ug kadaklit sa kinabuhi.
Sa paggawas sa resulta sa Bar niadtong Miyerkules, nahandom sab nako ang kamabulukon sa abogasiya ni Creer.
- Latest
