EDITORYAL - Kinsa kaha’y mabulahan

Wa’y puas ang kasikas sa politika dinhi sa nasud karon, bisan og hagbay ra nga nahuman ang eleksiyon, apan ang uban wa pa gyud mahuman sa ilang pamolitika.

Partikular karon kining nahitabo kang Bise Presidente Leni Robredo nga daghan kaayo ang nagsige og atake kaniya. Diha’y election protest sa kampo ni kanhi senador Bongbong Marcos, wa na siya paapila sa Cabinet meetings, karon may gitawag na sab nga Naga Leaks.

Ang atake maklaro nga puntariya gyud ang mga sakop sa Liberal Party nga gipakasusama na lang nga mga walay nahimong maayo sa nasud samtang sila ang naa pa sa puwesto.

Tinuod, dunay mga lehitimong pasangil nga kinahanglang maimbestigahan apan mas daghan ang kadudahan ang motibo kay ang mga nangatake wala magpaila diha sa social media.

Ang bag-o karon mao kining gitawag og Naga Leaks nga nikatap sa social media, wa magpaila ang nagsuwat ug nag-post.  Ang unang parte niini base  sa report sa Philstar.Com, ang unod niini niakusar sa pamilyang Robredo nga nalambigit sa jueteng, pagpatay ug illegal drugs.

Kun tinuod pa kini, dili ba mas maayong mopaila ang nagbutyag niini sa social media? Sama sa gibuhat nila ni Edgar Matobato ug SPO3 Arturo Lascañas batok ni Presidente Duterte.

Si Robredo nga ania karon sa Sugbo tungod sa mga programa sa iyang opisina kabahin sa kababayen-an, namahayag nga wala siya mabalaka niini kay dili man kini tinuod.

Nagduda si Robredo nga kabahin kini sa plano nga gub-on siya ug ang iyang pamilya sa mata sa publiko bahala pa og mga bakak ang mga akusasyon. Busa, sa dili pa motuo ug magpadala niining mga post sa social media, angay gyud nga tan-awon sa mga tawo kun makatabang ba sa Pilipinas kining mga pag-atake ngadto ni Robredo.

Kun walay kamatuoran kining tanang alegasyon batok kang Robredo, atong hinuktokan kun kinsa man kaha maoy mabulahan niining pagpangdaot kaniya.