Yayakapin kita hanggang kamatayan
Ngayong Valentine’s day at magpakailan man
Iniibig kita sintang paraluman
Pag-ibig na ito’y walang katapusan
Pagka’t tataglayin hanggang kamatayan
Kung wala ang buwan at napakadilim
Dala ko sa puso masidhing damdamin
Kaya sa karimlang may lambong na itim
Nasa aking diwa ang iyong luningning
Madugo ang aking landas na tinatahak
Sapagka’t ang bayan ay mapapahamak
Kaya sa labanang dugo’y dumadanak
Ang iyong larawan ang bandilang hawak
Sa malayong bayang kinaroroonan
Taglay ko sa puso ang iyong kariktan
Sa aking pagtulog sa aking higaan
Nasa diwa ko rin ang iyong kagandahan
Di ka nawawalay sa aking gunita
Aliw ka ng puso tanglaw ka ng diwa
Sa pagtatrabaho’t sa lahat ng gawa
Kasama rin kita magandang diwata
- Latest