Krisis sa Ermita

Mura’g nagpadayon kining krisis diha sa Barangay Ermita sa dakbayan sa Sugbo nunot niining pagkasuspenso sa mga opisyales sa maong lugar. Kini tungod kay padayon gihapon ang pag-alburoto sa mga residente niini sa gidangatan ni Kapitan Imok Rupinta ug mga konsehales.

Hangtud karon, nagdumili pa ang mga residente pagdawat og caretaker sa Ermita nga gitudlo ni Mayor Tomas Osmeña puli sa nasuspenso nga kapitan. Hugot nilang gibarugan nga kun si kinsa man gani ang caretaker, kinahanglan taga barangay kini.

Ambot kun adunay gahum ba si Osmeña pagtudlo og caretaker sa Ermita, gawas sa Department of the Interior and Local Government ug sa Office of the President. Kun aduna man gani, ambot kun makalapas ba kini sa balaud mahitungod sa pagka-apolitical sa barangay.

Gusto ni Osmeña nga itudlo ang iyang paborito nga pulis nga si SPO1 Adonis Dumpit isip caretaker sa Ermita. Kini aron kuno malimpiyohan ang barangay gikan sa kriminalidad, ilabina sa negosyo sa ilegal nga druga.

Gawas ni Dumpit, gusto usab sa mayor ang kapitan sa Barangay Tejero ug si kanhi city councilor Jun Pe nga maoy modumala sa Ermita samtang dili pa makabalik sa puwesto si Rupinta ug mga konsehal nga nasuspenso sulod sa 90 ka adlaw.

Apan puwerte nga nakakisikisi ang mga molupyo sa maong barangay. Isip suporta sa suspendido nga mga opisyal, ilang gitrangkahan ang barangay hall kay lagi dili nila madawat nga usa ka outsider ang mahimong caretaker.

Kun magpadayon kining krisis sa maong barangay, ang katawhan ra usab niini ang maalkanse. Sigurado nga mapurnada gayud ang serbisyo ngadto sa katawhan sama sa paghakot sa mga basura, mga transaksiyon diha mismo sa barangay hall ug uban pa.

Gani, duha ka bulan nga wala na kunoy suweldo ang mga trabahante sa maong barangay. Kini gumikan kay wala’y mo-process sa mga papeles nunot niining pagkasuspenso sa maong mga opisyales. Mao nang kinahanglan gayud nga dalion sa DILG nga masulbad kining dakong suliran diha sa Barangay Ermita.