Libingan ng mga Bayani nga wa’y bayani

Wa gihapon mamatay ang isyu sa paglubong sa patay’ng lawas sa kanhi diktador nga si kanhi presidente Ferdinand Marcos didto sa Libingan ng mga Bayani. Bisan og nalubong na, pero ang isyu sa iyang paglubong wala mahiuban kaniya.

Kini tungod kay ang mga biktima sa rehimeng Marcos ug ang wala mahiuyon sa hukom ni Presidente Rodrigo Duterte sa pagpalubong kaniya sa Libingan ng mga Bayani, dili makadawat nga sila nausahan sa mga Marcoses nga midali-dali pagpalubong ni Marcos bisan og wala pa mahimong pinal ang hukom sa Korte Suprema.

Sa ako na nga nasulat sa nangagi nakong mga lindog, ang dugokan niining kasaba sa paglubong ni Marcos sa Libingan ng mga Bayani mao ra gayud ang pulong nga “bayani.”

Ang pulong nga bayani lapad ang ipasabot niini ug ang kongreso wala magpakabana sa pagklaro kun si kinsa ang pagailhon nga bayani mao nga kun nakahinumdom pa kamo akong gisugyot, ang Kongreso angay nga magpalabang og balaod nga maghatag og klaro nga kahulogan sa pulong nga bayani aron wala na’y kaguliyang sa umaabot nga katuigan kun may susama nga sitwasyon nga mahitabo.

Gisuportahan usab nako ang sugyot ni Senador Richard Gordon nga usbon ang tawag sa Libingan ng mga Bayani ug ibalik na lang ang karaan nga pangalan niini tungod kay sa maong menteryo, wala man gani bisan usa ka bayani nga atong nailhan nga nalubong.

Ang Libingan ng mga Bayani gitawag kini og Republic Memorial Cemetery nga gihimo kaniadtong 1947 agi og pagyukbo ug paghatag og kataposang pahulayanan sa 33,520 ka sundalong Pinoy nga miula sa ilang dugo sa kampanya sa Pilipinas nga mahimo kining gawasnon kaniadtong 1941-1942 ug sa panahon sa Liberasyon kaniadtong 1944-1945 atol sa ikaduhang gubat sa kalibutan.

Ning mao nga menteryo, wala malubong sila si Jose Rizal, Andres Bonifacio, Emilio Aguinaldo ug ang uban pa nga mga hero nga inyo na nga nailhan. Mao ra ni Libingan ng mga Bayani nga ang atong nailhan nga mga bayani wala malubong dinhi.