Gustong idonar ang yuta sa iyang kapuyo

Dear Atty. Divine,

Usa ko ka OFW ug dugay na mi nga nagbuwag sa akong asawa apan wa pa ma-annul ang among kaminyuon. Wa mi anak sa akong asawa ug akong nahibaw-an nga may lain na siya nga pamilya karon ug ako aduna na sa’y laing pamilya, ug gani may duha na kami ka anak. Aduna ko’y napalit nga property ug nakapangan kini sa ako. Apan matud pa sa akong amigo nga mahimo kuno nga mangayo og bahin niini ang akong kanhi asawa sa maong property kay wa pa man ma-annul ang among kaminyuon. Gusto unta nako nga idonar na lang sa akong kapuyo kining maong property. Mahimo ba kini nako nga buhaton? Daghang salamat. — Jude

Dear Jude,

Bisan pa kun dugay na kamo nga nagbuwag sa imong asawa apan tungod kay wa pa man ma-annul ang inyong kaminyuon, nagpabilin gihapon kamong minyo sa mata sa atong balaod. Tungod niini, ang bisan unsa nga kabtangan nga imong mapalit makonsiderar kana nga gipanag-iya gihapon ninyong duha sa imong kanhi asawa ug aduna siya’y katungod unya nga mo-claim sa iyang bahin.

Samtang kalabot sa plano nimo nga idonar sa imong live-in partner, di sab kana mahimo kay gidili kana sa balaod. Ang Article 87 sa atong Family Code kini nagdili sa magtiayon sa pagdonar og butang sa usa’g-usa ug lakip nga gidid-an niini kadtong manag live-in partner. Busa ang maayo nimo nga buhaton karon mao ang pagpa-annul sa imong kaminyuon ngadto sa korte aron kun maaprobahan na sa korte, mahimo na ikaw nga magpakasal sa imong kapuyo karon. Mahimo sab nga imong ibaligya ang imong property pagkakaron ug mopalit lang ka pag-usab kun ma-annul na ang imong kasal. -Atty. Divine