Sentensiya ni Duterte
Sakto si President-elect Rodrigo Duterte nga kurakot ang pipila sa mga sakop sa media nga gipatay. May mga sakop sa media nga gipatay kay nigamit sa ilang propesyon aron sa pagpangilkil ug pagbuong sa kadungganan sa ilang mga gipangayoan nga nagdumili paghatag. Tinuod sab ang iyang pasangil nga pipila nila nanawat og kuwarta apan nibunal gihapon sa ilang mga gidawatan.
Apan di tanang biktima badlungon. Kasagaran sa mga sakop sa media nga gipamatay sa nangaging katuigan ligdong nga nagtuman sa ilang trabaho. Ang ilang kaisog pagbisto sa mga binuang sa gobiyerno ug pribadong sektor maoy nakapatunglo nila sa laktod nga kamatayon.
* * *
Sayop sab ang sulti ni Duterte nga angay’ng patyon ang mga sakop sa media nga kurakot. Samang sayop ang iyang pasidaan nga mahimong patyon sab ang ubang mga sakop sa media kun padayon nga manghilabot sa pribadong mga kinabuhi sa mga politiko ug mga negosyante nga maigo sa ilang mga komentaryo.
Bisan ang kurakot nga mga sakop sa media di makiangayon nga sentensiyahan og kamatayon. Ang pagpanguwarta sa ilang propesyon tinuod nga salawayon ug angay’ng badlungon sa labing daling panahon pinaagi sa pagtaktak nila sa media organizations o pagtaral nila sa mga hukmanan. Gawas kun moinsistir si Duterte pagpatuman sa iyang kaugalingong mga lagda, ang mga balaod wa magtugot sa pag-ihaw sa mga kurakot.
* * *
Apan angay’ng hangpon ang kaisog ni Duterte sa pagbuyag sa kurakot nga mga sakop sa media. Mahimo ra baya unta siyang magpapogi sama sa ubang mga opisyal sa gobiyerno sa pagpasalig paghatag og hustisya sa mga tagtungod sa mga sakop sa media nga nangligdas sa nangaging katuigan.
Mahimo ra baya unta siyang maglingiw-lingiw sama sa kadagkoan sa media organizations nga maayo lang mowara-wara sa ilang code of ethics apan igo lang molingiw, ang uban mao gyud gani ang manugo, sa ilang mga peryodista sa pagpanguwarta pinaagi sa paglubag sa mga balita ug pagpataka sa mga komentaryo.
* * *
Mahimong nabiktima o nakasaksi gyud si Duterte sa pangurakot sa media atol sa kampanya ug sa duha ka dekada niyang pagduma sa Davao City Hall. Apan wa siya’y igong sukaranan sa pagtulisok sa tanang sakop sa media nga gipamatay ug sa pagpasidaan og kamatayon sa iyang gidudahan nga mga magsisibya ug mga peryodista.
Labi na nga isip pangu sa tibuok republika sugod sa udtong tutok sa Hunyo 30 ang iyang mga pamahayag mahimong isipon nang mga lagda. Busa mahimong makahatag og sayop nga mensahe ngadto sa tinuod nga mga kurakot ug kriminal nga hagbay rang nagdumot sa mga sakop sa media. Hinaot nga sa di pa mahagba ang dugang mga sakop sa media, gamiton ni Duterte ang iyang kinaham nga panagang: Nga nagkomedya ra diay siya.
- Latest
