Tuig sa unggoy

Kun sa Chinese Zodiac ug sa tradisyon sa mga Chinese ang subayon, tuig ron sa mga unggoy.

Hinuon, magsugod ang Chinese New Year sa Pebrero 8 pa sa 2016. Apan kun tradisyon ug inpluwensya ang tan-awon, daghan sa mga Pinoy ang motuo ug nisagop sa tradisyon sa mga Insek sa pagsugat sa Bag-ong Tuig.

Nag-una niini, ang lingin nga mga butang sama sa prutas, sa senina kinahanglan nga magsul-ob og polka dots, magsul-ob og puwa, mag-andam og mga pagkaon nga pilit, magpabuto ug daghan pa nga mga tradisyon sa pagtuo nga modani kini og swerte, magmalamboon ang tibuok tuig, swertehon sa gugma, molampos ang negosyo ug pinaagi sa pagsaba-saba maabog ang dimalas.

Sa pagsugat sa Bag-ong Tuig mopatigbabaw ang kasaba sa mga pabuto. Kun wala ka maanad sa kasaba, sigurado nga matugaw ang imong pagkatulog sa tungang gabii tungod kay ang kalanog sa mga pabuto ug ang kabaho sa pulbora ang mopasulabi.

 Apan kining tanan, dili igsapayan sa mga nagtuo nga sa maong matang sa pagsaba-saba ilang maabog ang dimalas. Nakalimtan sa maong mga tawo nga sa pagpabuto ug dili pa gani makontento dagko nga mga pabuto ang gigamit, nga ilang gidani ang dimalas.

Dimalas nga dili lang molungtad sa usa ka tuig, kun dili, hangtod sa ilang pagpakabuhi tungod kay napungkol na, nabuta ug nakimay tungod kay nabuthan sa pabuto.

Ang 2016 base sa Chinese Zodiac maoy tuig sa mga unggoy.  Kun ang kinaiya sa unggoy ang basehan, listo, agresibo, makamao, abtik, utokan, masinugtanon, kugihan ug mapinanggaon. Apan duna say kinaiya ang unggoy nga daling masuko, motamihid sa mas ubos kaniya, maru, arogante, madudahon ug dawo.

Apan magka-uyon ang unggoy sa Ox ug rabbit tungod kay giingon nga kining maong mga mananap adunay kaparehasan sa kinaiya busa magkasinabot.

Apan dili maayong pareson ang tigre ug baboy sa unggoy tungod kay lahi ang ilang panglantaw ug values. Dili sila magkasinabot ug kanunay mag-away. Walay pagtahod ug pailob  sa usa’g-usa. Busa, kanunay nga magkasungi nga mosangpot sa panag-away.

Kun matinuod man kini o dili, daghan ang mainteres ug magpakisi sa pagbasa sa ilang mga horoscope. Ang uban magpahimalad, magpa feng sui tungod kay gustong makabaton og kasigurohan sa pagpuyo.

Ato lang panghinaot nga maila sa usa’g-usa ang iyang kaugalingon, kun unsay iyang kahuyangan ug mga positibo nga kinaiya. Iya kining mapalambo pa ug makontrolar ang mga bati nga taras sanglit dili gyud kini hingpit nga mawala. Tungod kay diha sa pagsinabtanay nga maangkon nato ang kalinaw ug maayong pagpakigrelasyon sa atong isig-katawo.