Hagit sa bag-ong tuig!

Unsa man ang bag-o sa Bag-ong Tuig? Kini nga pangutana maoy nisantop sa akong huna-huna samtang naminsar ko sa akong pagsulat niining akong lindog.

Alang kanako ang tuig ra man ang nabag-o, apan nagpabilin nga karaan ang taras ug pamatasan sa mga tawo.

Sa bisperas pa lang sa Bag-ong Tuig, nagkapuliki ang mga tawo sa pagpamalit og mga prutas nga kuno palihi nga matud pa maghatod kanila og swerte sama sa mga lingin nga prutas  ug mga pilit nga pagkaon.

Daghan usab nga mga pabuto nga nidagsa sa mga baligyaanan nga igo ra duslitan sa pagsugat sa Bag-ong Tuig aron kuno pambugaw sa demalas.

Ingon na lang gyud niini kanunay ang mahitabo kada sugat sa Bag-ong Tuig bisan unsaon sa pagpahimangno sa mga otoridad nga likayan ang paggamit sa mga pabuto apan kanunay usab ipatigbabaw ang kagahi sa ulo nga usahay mosangpot na hinoon sa disgrasya.

Bisan pila pa ka mga palihi ang himoon sa mga tawo sa Bag-ong Tuig, wala gihapon kini kapuslanan kun magpabilin ang kinaiya sa pagkatapolan.

Dili lang ang kinaiya ang angayan nga usbon, kun dili, ang kinatibuk-an nato nga pagkatawo ang atong bag-ohon. Kini ang dako nga hagit dili lang sa New Year, kun dili, sa tibuok tuig. Sayon kaayo paminawon apan lisud buhaton!

Dili nato isalig sa swerte ang atong kinabuhi ug panginabuhi, kun dili, ipaagi nato sa kakugi ug paningkamot inubanan sa hugot nga pag-ampo aron kita molambo.

Happiest 2016 kanatong tanan!