Brgy Agus, Lapu-Lapu City
“Pirmi lang gyud nga magbaha ang karsada atbang sa Deca Homes unya kun kusog ang uwan, lawom kaayo ang tubig nga baho. Luoy kaayo ang mga motorista kay inig-abot sa tungatunga mapawong ang ilang makina.”
Brgy Dakit, Bogo City
“Dili man tinuod nga reklamo nga adunay multicab diri sa among barangay nga gigamit personal sa anak sa usa ka opisyal. Wala man mi multicab.”
Brgy Caputatan Norte, Medellin, Cebu
“Magpatabang unta mi nga mabutangan og linya sa tubig diri sa Sitio Tunga kay lisod kaayo ang tinubdan namo sa tubig, puso ra gyud intawon mi pirmi magkawos sa tubig, hasol kaayo labi na kun mag-uwan.”
Brgy Maguikay, Mandaue City
“Diri sa Sitio San Jose kay naproblema gyud mi panahon sa ting-uwan kay way klarong drainage system ug mapundo ang tubig. Dugay na kaayo ni nga problema pero hangtod karon wala pay aksyon sa mga opisyal sa barangay.”
Brgy Basak, Lapu-Lapu City
“Maayo unta og atimanon sa among kapitan ang suga nga naa mahimutang luyo sa Vistavilla kay luoy kaayo ang mga estudyante nga moeskwela’g gabii kay ngiob kaayo ang lugar, kuyaw kaayo og naay magbinuang labi na sa mga babaye nga estudyante.”
Brgy Tipolo, Mandaue City
“Ang mga nagpuyo sa Sitio Maharlika nag-iyahay na man lang og padako sa ilang mga tindahan ngadto sa karsada ug maglisod na hinoon pag-agi ang mga tawo panahon sa buntag ug hapon. Unya kun naay moparking nga sakyanan sa ilang tungod masuko pa mura’g silay tag-iya sa sidewalk ug karsada.”
Brgy Lahug, Cebu City
“Diri sa Sitio Bayanihan kay swerte na kaayo kun makuha ang basura kaduha sa usa ka semana. Gani karon magtulo na ka semana nga wala makuha ang mga basura, asa na man ang ilang pasalig nga pangalagad panahon sa kampanya?”
Brgy Magsico, San Fernando, Cebu
“Concern lang ko sa among karsada unta ila nang tagdon kay dugay nami nga nag-antos niini tungod sa kaguba.”
Brgy Inayawan, Cebu City
“Badlongon unta sa among mga opisyal ang mga batan-on nga pirmi nga magmugna’g kasaba panahon sa gabii labi na diri sa may Sitio Lomboy unya kasagaran ra ba nila mga menor de edad.”
Brgy Cansaga, Consolacion, Cebu
“Maayo unta og mahunong na ang pagsige og quary diri kay kuyawan mi nga malunopan kay mokusog na man ang bul-og sa tubig kun kusog ang uwan. Kaming mga residente dinhi ug sa Brgy Pitogo maoy apektado kun simbako magpadayon ang gihimong quarry.”
Alang sa inyong mga reklamo text lang sa 09062973166
- Latest
