Brgy Poblacion 3, Carcar City

Amo lang unta klarohon Sir ning bahin sa mga inidoro nga naa sa mga barangay kun libre ba kining ipanghatag sa nanginahanglan. Diri sa amoang barangay saadsaaran ra man mi kun mangayo pero sa ubang barangay hatag man dayon labi na sa Brgy. Guadalupe.”

Brgy Jubay, Liloan, Cebu

“Kining tulay sa among barangay padung sa Brgy. Cotcot kay wala man gyud padayona’g trabaho gibiyaan ra man intawon sa contractor.”

Brgy Marigondon, Lapu-Lapu City

“Mamalihog unta mi sa mga opisyales namo sa barangay nga atimanon ning dalan padung sa Tonggo kay  baho kaayo unya naa pay agianan way suga ang mga poste ngitngit kaayo."

Brgy Poblacion, Toledo City

“Nganong dili man 24 oras ang serbisyo sa laboratory sa public hospital namo diri sa siyudad nga unta importante man kaayo na alang sa mga delikado’g sakit nga mga pasyente.”

Brgy Obong, Dalaguete, Cebu

“Mangutana lang unta mi Sir kun makatarunganon ba nga tag 265pesos ang bayranan sa mga tawo nga mokuha’g police clearance diri sa among lungsod? Kay sa resibo kay 165 ra ang clearance unya 100pesos ang iya sa cooperative."

Brgy Labogon, Mandaue City

“Amo lang unta ireklamo ning poste sa PLDT nga dunot na kaayo kay kuyaw na nga matumba tungod kay gikaon na sa anay. Naa ni mahimutang unahan gamay sa Rattan  Pacifica kuyawan mi.”

Brgy Perrelos, Carcar City

“Ang among karsada diri gisemento na tinuod pero naay gibilin nga mga lungag sa tungatunga wala gyud butangi og signage.”

Brgy Mantuyong, Mandaue City

“Naa lang mi reklamo kabahin aning mga tanod sa among barangay sir Jun kay mura mag way mga gamit sige lang dawat honorarium. Naay mga higayon nga magpa-blotter unta ko didto sa barangay hall bahin sa kawat nga nahitabo sa among lugar.”

Brgy Umapad, Mandaue City

“Manghinaut mi nga masumpo ning illegal parking kay hasol kaayo sa mangaging ubang sakyanan labi ning mga dagkong truck. Kun naay moabot nga towing truck aron guruyon ang mga sakyanan nga nag illegal parking naa dayon usa ka konsehal nga maoy manawag sa tag-iya sa sakyanan arun mabalhin dayon ni nila.”

Brgy Agus, Lapu-Lapu City

“Amo lang ireklamo ning usa ka habalhabal driver nga magbiyahian diri sa among barangay labi na sa Guisi gikan sa Grand Mall kay magtakintakin man og armas sa iyang kilid inig pamasahero niya.”

Brgy Poblacion, Talisay City

`“Hangyo lang unta mi Sir nga butangan og tanod o ba kaha traffic enforcer ning atubangan sa Talisay City Central School kay naa nay mga bata nga nadisgrasya tungod aning pakusog nga padagan sa mga motor.”

* * *

 Alang sa inyong mga reklamo text lang sa 09062973166