Trapiko sa drones
Human nipahibawo ang Australia Post nga sugod sa sunod tuig, 2016, mopalupad na sila og drones nga mokarga ug mohatod sa mga pakete ngadto sa mga tugkaran sa gipadad-an nga mga pinuy-anan, nitumaw dayon ang mga pangutana kun sundon ba sa postal services sa Pilipinas ug ubang kanasuran sa kalibotan.
Way nagduda sa katakos sa Estados Unidos ug ubang adunahang mga nasud sa pagpalapad ug paghimong mas paspas sa ilang postal services pinaagi sa paggamit sa mga ayroplano nga way piloto. Apan mas daghang nangutana may katakos ug kuwarta bang Philippine Postal Corporation (PhilPost) paggakos sa bag-ong teknolohiya pagpalambo sa nagkamang natong postal system.
* * *
Karon pa lang, duha ka buwan na lang sa di pang 2016, andam nang drones sa Australia Post. Kansang mga tagduma niingon nga ang matag drone dunay GPS, nga maoy manimon sa direksiyon, ug reserba nga makina, nga mopuli kun mopalyar ang orihinal nga sistema ug makada og hangtod duha ka kilo ka kargamento.
Mga nikuwestiyon sa kahaom sa drone sa operasyon sa PhilPost niingon nga di masakwat ang balikbayan boxes, peligrong matsambahan sa mga tirador, mahimo sang maggapos sa nagkayamukat nga mga linya sa kuryente ug komunikasyon ug kun malampusong makatugpa sa yuta di mahitabo nga pasayluon sa gikaintapang mga sakop sa tiempo gang.
* * *
Nangandam nang daan sa gipaabot nga pagkatap sa drones ang National Aeronautics and Space Administration (NASA) pinaagi sa pagpalambo sa air traffic management system. Aron nga moduma di lang sa mga ayroplano ug helikopter nga may mga piloto kun di mag-apil sab sa drones nga gikontrolar sa computers.
Gipaabot nga kaliboan ka drones ang paluparon sugod sunod tuig sa higanteng mga kompaniya sama sa Amazon, Google ug Facebook. Nga di lang mohatod og mga kargamento kun di mopakatap sab og internet signal. Mopakatap sang ubang mga kompaniya og drones pagsuhid sa mga minahan, umahan ug mga linya sa kuryente. Dakong hagit ang pag-umol og sistema aron nga di sila magkabanggaay.
* * *
Gisugyot ang paggamit og cellular data connections, kay dagko man ang ekipo sa komunikasyon sa kasarangang mga ayroplano ug helikopter, pagkontrolar sa mas huot nga air traffic pinaagi sa pagpasimang sa drones gikan sa mga dapit nga daghang kasugat o pagpabalik ug pagpatugpa sa drones nga mangasaag.
Gituki ang mga lagda sa gitas-on sa lupad sa drones aron nga di makahasol sa mas taas nga ruta sa mas dagkong ayroplano apan di sab makahasol sa kabalayan ug buildings sa ubos. Gitimbang-timbang unsa ang labing tukma nga gidak-on sa tugotan nga drones. Gitun-an sab unsa ang labing luwas nga porma, mga ayroplano ba lang nga may pako o iapil sang mga helikopter ug ubang porma sa mga sakyanan.
- Latest
