Plano ni Winston

Bisan pa man kun nagdumili siya pagtubag sa mga pangutana ko modagan ba gayud siya pagka-gobernador sa Sugbo, gikatag ni kanhi Provincial Board member Winston Garcia ang iyang mga plano alang sa probinsiya.

Sa iyang pagpakig-atubang sa mga editor, kolumnista ug reporter sa The Freeman ug Banat News, gihan-ay ni manlalaban Garcia, ang kanhi presidente sa Government System Insurance Corporation, ang daghang proyekto nga iyang prayoridad kun mapili siyang amahan sa lalawigan sa sunod tuig.

Pipila sa iyang dagkong proyekto mao ang mga ambisyosong reklamasyon sa mga lungsod sa Cordova ug Minglanilla aron pagdani og bilyones nga puhonan ug pag-umol og liboan ka trabaho alang sa mga Sugboanon. 

Paningkamotan usab ni Garcia nga mabalhin na ang Cebu International Port ngadto sa lungsod sa Consolacion. Mabaw na kuno ang kasamtangan nga lokasyon sa CIP ug dili na kini makasugakod pa sa dugang kargamento.

Kabahin sa Mactan Cebu International Airport, nagtinguha siyang madugangan kini og usa ka runway aron maka-accommodate kini og dugang pang international flights. Alang kang Garcia, useless kuno ang unsa mang expansion project sa terminal sa MCIA kun dili butangan og dugang runway.

Alang sa mass transportation, matud ni Garcia nga iyang trabahoon nga ma-realize na ang proyekto pagtukod og light rail transit nga motadlas sa Metro Cebu gikan sa dakbayan sa Carcar ngadto sa dakbayan sa Danao.

Kining tanan naglangkob sa dakong plano ni Garcia alang paghimo sa Sugbo isip sentro sa komersiyo ug turismo sa Asia. Sa pagkakaron, iyang nakita nga kulang gayud ang Sugbo sa inprastraktura pagdani og dugang langyaw nga mamumuhonan ug turista.     

Ako siyang gipangutana kun matuman ba kining engrande niyang mga plano sulod sa siyam ka tuig kun ugaling mapili siyang gobernador sulod sa tulo ka termino. Matud niya nga dako siyang positibo niini tungod kay kining tanan ipailalum man sa Public-Private Partnership ug nga walay magasto ang kagamhanan niini bisan piso.

Hinuon sa dili pa kini matuman, anaay dakong kampanya nga nagpaabot ni Garcia alang sa dakong piniliay sa sunod tuig. Tungod lagi kay anaa siya sa oposisyon, iyang giangkon nga anaa kaniya ang dakong pressure pagdaug.