Si Mar ug Yolanda

Duha na ka tuig ang milabay human gikunis-kunis sa bagyo’ng Yolanda ang Tacloban City. Apan hingpit na ba nga naayo ang mao nga siyudad? Daghang biktima ang nagpasad nga wala na’y kinabuhi. Halos tanang balay nangabungkag ug gipino-pino sa storm surge nga ingon sa adunay mga hait nga ngipong miusap kutob sa iyang matilapan, mabutang man, mananap o matawo.

Mihugpa ang dako’ng kagutom sa maong dapit. Wala’y bugas nga maluto, wala’y tubig nga mainom. Dinhi gipakita kinsa ang duna’y malumo nga kasingkasing?

Mga foreign rescuers sama sa Amerikano ug uban pa, bisa’g may kusog pa nga hangin nga nagpabilin, maoy una nga miabot sa gipulpog nga lugar.

Nagdala sila’g mga medisina ug pagkaon kay gusto nila nga luwason ang mga buhi pa. Ang nag-una nga mga foreign reporters nahibulong ug nakapangutana.

“Hain na? Hain na ang presidente ug bise presidente sa Pilipinas? Ngano nga wala man dayon sila manglihok aron tabangan kining nangabutalid nga mga biktima sa katalagman?”

Uwahi na nga niabot sila si PNoy ug Mar. Gisaway ang kalangay sa ilang lihok sa mga foreign media apan gituis kini ni Korina Sanchez nga mihulagway nga sayop ang reports kay dili kuno mao ang tinuod nga nahitabo.

Maayo na lang kay hitsas sa mga gamit ang maong Amerikano nga reporter ug gipakita ang footage sa talan-awon nga magtug-an kinsa ang nagtug-an sa matuod?

Pag-abot ni Mar sa nahitaboan, imbes molihok dayon aron tabangan og sulbad ang problema, midalikyat pa g’yud og posing atubangan sa mga kamera para makapogi points.

Ang nakaparat kay diha nga gipangayoan siya’g tabang sa mga waray nga mao ang balwarte sa mga Romualdez, wala dayon siya’y gikatunol. Ang pagpakiluoy sa mga biktima napunta lang sa mga dalunggang bungol, diin iya lang kining gitubag sa pag-ingon: “Aquino ang Presidente ug dili Romualdez.” Husto, ba? Sakita sa dughan, uy!

Dinhi nakaingon ang katawhan: “Kun ang bagyo’ng Yolanda mabangis, si Mar, mas bangis pa!” Basta makita sa katawhan si Mar, mahinumdom dayon sila sa salbahis nga Yolanda. Ug usab sa unsa’y gibuhat ni Mar ngadto sa mga Waray?