Si Binay ug ang mga survey

Sa mga survey sa mga presidentiables, pirmeng mag-una si Vice President Jejomar Binay. Mao nga lipay kaayo si Kris Aquino ug ubang mga supporter sa bise presidente. Si Binay sa iyang bahin, subrang naniguro, lagmit naghuwat na lang sa oath-taking tapus sa 2016 elections.

Apan, sa ako nang giingon dinhi, maminaw ka sa radio, ug sa akong pakighinabi sa pipila natong kaila ug mga higala, mora man og dili silang Binay. Sama kanako, wala pa silay napilian nga ipuli ni Noynoy, taliwa sa daghan nang mipadayag  sa ilang tinguha paglansar pagka-Presidente.

Ambut kinsay mga respondents sa mga survey nga gihimo, basta kay sa akong paniid, mahimo nga nasayop ko, lahi ang atong sentimento dinhi sa mga lalawigan kay sa kaulohan. Kay sa survey sa radio sa duha ka commentary program, wa man manimaho si Binay. Mas nigawas pa ang ngalan ni Duterte sa Davao, sundan ni Senador Grace Poe.

Busa, kinahanglan mosuroy si Kris Aquino sa tibuok nasud, pagkombinser kanato dinhi aron motuo ta niya nga si Binay maoy labing takos mamunoan sa nasud, after Noynoy … kon siya man, si Kris ang mo-volunteer pagka-campaign manager ni  Binay.

Nagkaus-os na kono ang popularity ni Noynoy.  Mao ba?  Sa ato pa, wa na kono ta ganahi niya. Apan, ngano man ning usa ka headline sa Philippine Star nga nagkanayon:  "Moody's retains stable outlook on Phl." Sa ato pa, ang Moody's Investor Service, usa ka global credit rating firm, misalig  gihapon sa pagka-stable, pagkalig-on sa ekonomikanhong kahimtang sa atong nasud.

Kining mga credit rating nga gihimo sa nagkalainlaing credit institution sa kalibutan, karon pa kini mahitabo sa atong nasud, sukad masukad, maoy hinungdan nga nagkadaghan na ang mga foreign investors ang misulod nganhi sa atong nasud.

Labi na unya kon, kaluagluagan na  ang mga economic restrictions sa mga langyaw’ng magpapatigayon nga buot mobubo sa ilang capital nganhi sa nasud, pinaagi sa paghimog kausaban sa maong mga economic provisions sa atong Constitution.

Mao kini ang atong gikabalak-an, nga kon ang mopuli ni Noynoy, makapadayon ba unya niini karong  pagsalig sa international community nganhi sa atong nasud, labi na sa natad sa patigayon.

Kon katuohan ang mga survey, ug kon mao usab ang actual nga mahitabo pinasikad sa resulta sa maong mga survey, si  Binay ang sunod natong Presidente, ug lagmit si Kris Aquino maoy himoong Executive Secretary, o Presidential Spokesperson., o Secretary of Information.

Unsay imong panan-aw kon mao kini ang mahitabo sa atong nasud? Of course, daghan pang mahitabo between now  and 2016. Lagmit dunay ddunay mosulbong nga personality gikan sa private sector, kay maora man og wa tay mapili sa incumbent natong mga politico.

Si Binay nangulitawo ni Manny V. Pangilinan nga mahimo niyang vice presidential candidate. Sa akong pangagpas, kon akoy pabut-on, kon mosalmot man si MVP sa politika, iyang daganan pagka-Presidente gyud, ug dili pagka-bise lang. Di ba?