Anak makapangayo ba og bahin sa yuta bisan buhi pa ang iyang amahan

Ang mga anak adunay katungod nga mo-inherit sa ilang mga ginikanan samtang ang ginikanan mamahimo sab nga maka-inherit sa kabtangan sa ilang anak kun kini mamatay nga way compulsory heirs sama sa asawa, bana o mga anak. Apan makapangayo ba og bahin ang anak kun ang amahan magbaligya sa yuta nga iyang sinunod sa iya pang ginikanan? Kana nga pangutana ang akong tubagon karon sa akong column.

Dear Atty. Divine;

Aduna lang unta ko’y ipangutana labot sa kabtangan nga sinunod sa akong bana. Ang iyang inahan maoy original nga tag-iya niini ug tungod kay patay na man ang iyang inahan, akong bana ang naka-inherit. Ang unang asawa sa akong bana patay na ug aduna sila’y lima ka anak. Ako ang iyang ikaduha nga asawa ug wa mi anak. Karong bag-o dunay mitanyag sa akong bana nga paliton ang iyang yuta. Tungod kay tiguwang na ang akong bana nakadesisyon siya nga iya na lang ibaligya kay wa na man siya’y trabaho maayo na lang naa siya’y magamit nga pundo. Karon ang iyang mga anak interesado man sab sa halin sa yuta. Gani sila na ang nagbuot kun pila ang dapat nilang dawaton gikan sa halin sa maong yuta. Hasta ako ila nang giaway kay nagtuo sila nga ako’y makapahimus sa halin sa yuta sa ilang amahan. Ang akong pangutana attorney kun makapugos ba sa pagpangayo ang mga anak sa ilang bahin sa halin sa yuta nga sinunod sa akong bana? Mamahimo ba silang mobabag sa pagbaligya sa maong property? Hinaut nga imong mapasabot kanamo kining maong mga pangutana. Daghang salamat. — Aida

Dear Aida,

Tataw kaayo basi sa imong suwat nga ang maong yuta exclusive property sa imong bana. Buot ipasabot nga dili kini conjugal property busa way labot ang iyang asawa nga namatay sa maong kabtangan. Tungod kay exclusive property man kini sa imong bana, ang mga anak dili pa makapangayo og bahin samtang buhi pa ang ilang amahan gawas lang kun ang ilang amahan mismo ang boluntaryong mohatag kanila og bahin sa halin.Dili sab makabuot ang mga anak kun ibaligya sa ilang papa ang maong yuta kay dili man sila ang tag-iya niini ug wa man sila’y labot sa pinirmahay sa Deed of Absolute Sale. Apan lahi unta ang mahitabo kun conjugal property pa ang maong yuta kay pagkamatay sa ilang inahan, ang mga anak entitled na nga modawat sa ilang bahin sa namatay nilang inahan ug dili makabuot ang ilang amahan sa pagbaligya ilabi na kun mosupak ang mga anak. Kana kun conjugal property pa ang maong yuta apan dili man. Ang maayo nimong buhaton karon pakigsultii na lang ang imong bana nga kun dako ang halin sa iyang yuta bisan iyang hatagan sab og gamay nga share ang iyang mga anak aron way gubot apan dili sab maayo nga magbuot na lang sab ang mga anak kun pila’y dapat nilang dawaton. Hinaut nga akong natubag ang imong mga pangutana.

Alang sa inyong mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo.