Balay ug yuta gustong idonar

Adunay daghang paagi nga mabalhin ang ownershsip sa usa ka property  ug usa na niini pinaagi sa Donasyon. Unsay angayang buhaton kun ikaw gustong modonar sa imong property sa tawo nga gusto nimong binlan niini? Kana nga pangutana ang atong tubagon karon dinhi ning atong column.

Dear Atty. Divine,

Usa ako ka biyuda ug way anak. Aduna ko’y house and lot nga mao karo’y akong gipuy-an. Ang akong mga pag-umangkon nag-interes niining akong kabtangan kay wa lagi ko’y anak. Apan aduna ko’y gibuhi nga maoy miunong gyud kanako ug ako na sab ni siyang giisip gyud nga anak ug  mao untay gusto nakong binlan sa akong balay ug yuta. Unsa may akong buhaton aron mabalhin na ang title ning maong property ngadto sa akong binuhi  samtang buhi pa ko aron segurado gyud kining mapunta kaniya? Salamat daan sa imong pagtubag sa akong pangutana. — Lucy

Dear Lucy,

Kung gusto ka nga ma-transfer ang title sa imong property samtang buhi ka pa ngadto sa imong gibuhi nga maoy  miunong kanimo, mamahimo ka nga mo-execute og Deed of Donation pabor kaniya ug pinaagi niini ma-transfer ang ownership sa imong property ngadto kaniya sa higayon nga iyang dawaton ang imong donasyon ( Article 725, New Civil Code of the Philippines). Basi sa atong balaod, ang donor mamahimong mohatag sa iyang kabtangan sa tawo nga gusto niyang hatagan apan kinahanglan nga magreserba sab siya og para kaniya matud pa sa Article 750 sa atong Civil Code.  Sa ato pa, mamahimo nga imong himoong kondisyon sa imong donasyon nga samtang buhi ka pa ikaw una ang magpuyo sa maong balay ug yuta nga imong gidonar kaniya. Sa higayon nga imo nang mapirmahan ang Deed of Donation ug adunay acceptance sa imong gustong hatagan nga  maoy miunong kanimo then mamahimo na niyang ibalhin  sa iyang pangan ang title sa imong property bisan kun ikaw buhi pa. Ang maayo nimong  buhaton karon mao ang pag-adto og abogado aron ikaw magpahimo og Deed of Donation. Daghang Salamat ug Happy New Year! — Atty. Divine

* * *

Kun ikaw adunay mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.