Bugtong barong

Usa ray akong barong. Nga mao ray akong mahulbot kon pugson pagpatambong og pormal nga kalihokan. Sama sa tinuig nga pagpanumpa sa mga opisyal sa Kapisanan ng mga Brodkaster ng Pilipinas (KBP) Cebu Chapter. Ug kasal.

Nga mao ra ang tulo ka higayon nga nag-barong ko karong tuiga. Bag-ong laba ang akong barong atol sa induction ceremonies sa KBP maong wa kaayo ko mahasol nga nagsul-ob. Uwahi nang nahibaw-an nga kinahanglan kong mag-barong isip usa sa mga maninoy sa kasal sa among kauban sa ABS-CBN nga si Reena Elena Malinao ug Dr. Jose Tan sa niaging buwan. Maayo na lang nga di pa pa kaayo dagko ang gum-os.

* * *

Mas nauwaw nakong nisul-ob sa barong, nga nataligam-an gihapon paglaba, sa ikatulong higayon atol sa “Libreng Kasal Alang sa Kapamilya” niadtong Biyernes. Mas dagko na gyong gum-os ug di na malilong. Maayo na lang nga ngiob ang gawas sa St. Joseph Parish sa Mabolo tungod sa kusog nga bunok sa uwan. Kauban nakong maninoy nga si Cebu City Vice Mayor Edgardo Labella nangayo og pasaylo nga tungod sa uwan nalangay sila paglugsong gikan sa bukirang barangay nga iyang giduaw ug wa nay higayon pag-ilis og pormal nga barong. Mubo ang bukton sa iyang barong apan klaro nga mas bag-ong nalabhan ug naplantsa.

* * *

Duha gyod unta ang akong barong. Apan tungod sa pagsige og pahinumdom ni Padre Socrates Saldua sa binuwan namong misa sa ABS-CBN nga ang tinuod nga kahulogan sa charity mao ang “giving until it hurts” nadisgrasya ang ikaduha nakong barong. Sa “Kapamilya Bazzaar” nga among gipasiugdahan pila ka tuig nang nilabay, nagkasabot ming manghatag sa personal namong kabtangan. Nakahukom ko pagtahan sa usa sa akong barong. Apan ang nahatag mao ang mas bag-o ug mas nindot nakong barong. Charity gyud tingali tong tinuod kay sakitan pa man ko hangtod karon kon magsud-ong sa mas daan ug nag-inusara na lang nakong barong.

* * *

Human sa ikatulong sul-ob sa barong, giingnan nakong asawa nga ipahangyo ang among katabang nga kusukusoan ang liogan nga nangitom na sa di pa dad-on para sa dry cleaning. Apan gipakita sa akong asawa ang daghan uyamot nga sukaranan nganong di na angayng isul-ob pang akong barong: Daghan nang tastas sa giburda nga desinyo nga nagduda siyang nanglingiw ang nakabantay nga mga bisita aron lang nga di ko mauwawan.

Mahimong human sa daghang katuigan mailisan na gyong akong barong. Gawas lang kon may kalit na sang pormal nga kalihokan nga kinahanglang tambongan samtang wa pa kong kapalit og bag-o. Maayo diay tingaling ipayuhot lang nako og palaba sa di pa uwahing tanan. Bahala nang daan basta di gum-os ug mohayag na og diyutay ang liogan.

* * *

Email: [email protected].