Langyaw nga bana nga makakuha og divorce decree, unsay epekto sa asawa?

Wa itugot ang divorce sa Pilipinas. Apan ang atong Family Code (Article 26, 2nd paragraph) naglatid nga kun ang usa ka Pilipino maminyo og langyaw ug ang maong langyaw makakuha og divorce decree sa ilang nasud tungod kay gitugot kini sa ilang balaod, ang Pinoy nga asawa or bana sa langyaw mamahimo na  unya nga makaminyo pag-usab. Apan aduna pay proseso nga angayang buhaton sa Pinoy una siya makaminyo pag-usab ug kana ang atong tubagon sa atong column.

Dear Atty. Divine,

Usa ko ka Pinay apan naminyo ko og American National tulo ka tuig na ang milabay. Human sa among kasal mibalik  sa Amerika ang akong bana ug mipasalig nga iya daw kong ipetition aron ko moapas niya sa US. Miabot na lang og tulo ka tuig gikan sa iyang pagbiya nako apan wa man ko niya kuhaa ug wa na sab siya mobalik dinhi sa Pilipinas. Niadtong miaging buwan nakadawat ko og email gikan kaniya ug nagpahibawo nga gusto siyang mo-file  og divorce. Wa mi anak Atty. apan ang akong pangutana kun pananglitan makakuha siya og divorce sa US nagpasabot ba kana nga mamahimo na siyang magminyo og lain? Kun pananglitan magminyo sab ko og lain mamahimo ba  nako na  nga buhaton?Kun di siya makakuha og divorce unsa may akong buhaton aron ko makaminyo pag-usab?

— Eloisa

Dear Eloisa,

Kun ang imong bana nga usa ka American National makakuha og divorce decree didto sa Amerika, ang usa sa mamahimong epekto niini nga mamahimo na unya siya nga makaminyo pag-usab samtang ikaw mamahimo na sab ka nga makaminyo og lain basi sa Article 26 sa atong Family Code. Apan ang epekto sa divorce decree nga makuha sa imong bana nga langyaw sa US dili automatic nga mapatuman dinhi sa Pilipinas. Buot ipasabot nga sa dili pa na ma-recognized sa Pilipinas ang divorce decree sa imong bana aron ikaw tugutan na sab unya nga makaminyo, kinahanglan ka pa nga mopasaka og Petition sa Korte  aron pag-recognized sa divorce decree kay usa man kana ka foreign judgment. Ang atong Korte kinahanglan pa nga mosuta kun unsa ka tinuod or authentic ang maong divorce decree  nga nakuha sa imong bana ug sutaon sab sa korte kun gitugot ba sa ilang balaod ang divorce. Kun ma-recognized na sa Korte ang maong divorce decree hayan i-annotate unya kini sa imong Marriage Certificate sa NSO ug hayan mamahimo na unya ikaw nga makaminyo. Apan kun dili makakuha og divorce decree ang imong bana unya ikaw gusto nga magminyo og lain, usa sa mga option nimo mao ang pagpasaka sab og Petition for Annulment of Marriage dinhi sa atong Korte apan kinahanglan pa kana nga tun-an sa imong abogado kun aduna ka bay basihan or grounds aron ipa-annul or ipadeklarar nga void ang imong kaminyuon dinhi sa Pilipinas uban sa imong Amerkano nga bana. Hinaut nga akong matubag ang imong pangutana. Daghang salamat ug God Bless.

—     Atty. Divine

Alang sa inyong mga pangutana, ipadala lang sa Legal Corner sa Banat News sa V. Gullas St., Cebu City or email sa [email protected]. ug akong tubagon ang inyong mga pangutana matag adlaw’ng Miyerkules ug Domingo pinaagi sa akong column.