'Masakit ang joints ko,gout ba ito?'

—Ruben Basco, Algeciras St. Sampaloc, Manila

Maaaring gout ang nararanasan mong pananakit ng tuhod. Pero nararapat pa ring masuri ang iyong dugo kung ito ay may mataas na uric acid level. Magpa-laboratory test ka.

Masakit ang atake ng gout. Bukod sa pagsakit ng kasu-kasuan, nagkakaroon din ng fever ang pasyente. Kadalasang masakit at namamaga ang hinlalaki ng mga paa. Yung iba ay halos hindi maigalaw ang kanilang mga paa dahil sa tindi ng sakit.

Ang gout ay uri ng arthritis. Masakit ito dahil naki­kiskis ng joints ang mga natipon o nakadepositong monosodium urate crystals.

Kadalasang ibinibigay ng doctor sa may gout ay Colchicine para mawala ang kirot at makontrol ang pamamaga. Pero may side effect ito gaya ng diarrhea at ang maaaring ma-damage ang bone marrow. Ipini-prescribed din ang Allopurinol, pero kailangang i-monitor ng doctor dahil maaaring magdulot ng pananakit ng tiyan, skin rashes at decrease sa white blood cells.

Maaaring maiwasan ang gout sa pamamagitan ng mga sumusunod:

• Magbawas ng timbang at iwasan ang pag-inom ng alak.

• Iwasang kumain ng atay, sardines, peas, beans, asparagus, cauliflower at spinach.

• Uminom nang walong baso ng tubig.

• I-check ang iyong gamot na iniinom sa high blood pressure. Ang gamot sa high blood ay may thiazide diuretics na nagko-cause ng gout.