Wala gihapon makat-on ang bombero

Samtang nangandam alang sa ilang midnight sale, nag-midnight fire ang Gaisano Capital. Mao kini ang hinungdan kun nganong dili na nako mapalit ang akong gisaaran nga lamisa ug lamisita. Mopalit man ugod unta ko niini niadtong adlaw nga wala pa masunog ang nahisgutang tindahan apan sa dihang nangutana ko kun may diskuwento ba giingnan ko sa akong suki nga inig ka Biyernes na sila mohatag og 20 porsiyento nga diskuwento kay mag midnight sale. Busa ako lang una nga gipadaplin ang pagpalit sa lamisa ug lamisita ug misaad nga mobalik na lang nianang pagka Biyernes. Apan unsa pa bay akong balikon nga nasunog naman.

Sa pagka tinuod halos tanan nakong gamit sa balay gipalit nako sa Gaisano Capital ug ang maong tindahan mao na usab kini ang nahimo nakong tambayan samtang magpalabay ko sa akong mga kalaay. Magbalhinbalhin lang ko sa food court sa taas ug mag coffee sa ubos. Naanad naman ugod ko ning tindahana tungod kay anha man ko magpalabay sa akong oras sa dihang sa Bombo Radyo pa ko nagtrabaho kaniadto. Karon ang building na lang sa Gaisano Capital ang nagbarog.

Usa sa nasinati nga suliran sa atong mga bombero sa ilang pagpakigkombati sa sunog mao ang kakulang sa mga kahimanan ug kagamitan sama sa mga breathing aparatus, tag-as nga hagdan ug uban pa.

Ang sunog sa Gaisano Capital nagdunyang na usab sa murag way kaayohan nga sakit sa buhatan sa atong kabomberohan. Ang sunog sa nahisgutang tindahan nagpakita lamang nga hangtod karon wala diay gihapon makat-on ang mga opisyal sa kabomberohan sa nasinati na nilang suliran sa nanglabay’ng mga sunog diin gisugat sila og kakuwang sa mga kahimanan ug kagamitan sa pagpakigkombati sa sunog.

Sa dihang nasunog ang taas nga building nga giokupar sa Veterans Bank kaniadto sa may dalan Colon gipahimangnoan nang daan sa kayo ang mga bombero nga dunay mga panahon nga adto siya magsugod sa ikapito nga andana sa building nga iyang sunogon busa gikinahanglan nang magpalit sila og hagdan nga ilang masak-an sa pagpakgang ug pagpawong sa kayo. Tungod niini nakahagdan gyod ang mga bombero ang nakaapan dili magamit ang hagdan kay gubaon.