Kaluha sa ASEAN Summit

Giisip sa mga opisyal sa Mandaue ug Lapulapu nga mamahimong kaluha sa pagpahigayon sa ASEAN summit karong Disyembre ang kalamidad nga posibling mamugna kon mohimo'g pangataki ang mga terorista.

Agi'g pangandam sa posibling kalamidad, gideklarar sa konseho sa Mandaue ug Lapulapu ang ilang mga dakbayan nga ubos sa "imminent danger of calamity" aron ilang magamit ang calamity fund sa pagpangandam.

Gikinahanglan kuno silang mamalit og ekipos aron pagtubag sa posibling kalamidad nga kaluha sa ASEAN summit. Apan si konsehal Wenceslao Gakit sa Mandaue di makatubag og unsa nga mga kahimanan ang gikinahanglang paliton.

Matud ni Gakit nga tun-an pa kuno sa City Disaster Coordinating Council nga gipangulohan ni Mayor Thadeo Ouano kon unsay ilang gamitan sa calamity fund. Kon wa pa diay maklaro kon unsay mga ekipos nga kinahanglang paliton isip kabahin sa pagpangandam sa posibling kalamidad dungan sa ASEAN summit unsa may gikarakarahan nila pagpasar sa resolution nga naghimo sa maong deklarasyon?

Ayaw kog ingna nga nahadlok ang konseho sa Mandaue sa singhag ni Ouano hinungdan nga bisan way klaro og unsay gikinahanglan ila nang gihatagan og pagtugot ang mayor nga hilabtan ang ilang calamity fund.

Ang calamity fund nagrepresentar ni sa singko porsiyento sa Internal Revenue Allotment sa matag LGU nga mamahimo lang gastohon pagtubag sa panginahanglan sa kalamidad. Ambot og kabahin ba sa hubad sa kalamidad ang ASEAN summit.

Ingon sab niini ang gihimo sa Lapulapu, gani mas una nga nihimo sa maong deklarasyon ang konseho sa maong dakbayan. Kunohay gamiton nila ang calamity fund sa preparasyon sa posibling calamity atol sa ASEAN summit.

Way kwestiyon kon tinuod nga preparasyon sa kalamidad maoy gamitan sa pundo tungod kay gitugot kini sa balaud. Apan ang nakaparat kay matud pa ni konsehal Eugene Espidido gigamit ni Mayor Arturo Radaza ang ilang calamity fund pagpamalit og mueblas alang sa kapolisan.

Kon tinuod ang gitug-an ni Espidido unsa may labot sa muebles sa pagtubag unya sa kalamidad?

* * *

Ang regional director sa Office of Civil Defense nga si Angel Gaviola kinsa nagsilbi sab nga executive officer sa Regional Disaster Coordinating Council nanalipod sa gihimo sa Lapulapu ug Mandaue. Matud ni Gaviola nga gikinahanglan kaayo ang maong deklarasyon aron maandam ang mga LGUs sa posibling kalamidad atol sa ASEAN summit.

Ang pangutana, duna bay rekomendasyon gikan sa national organizing committee nga ilang himoon ang maong pagpangandam? Matud ni Gaviola kinahanglan kuno ang dugang mga ambulansiya ug water tankers aron pagtubag sa panginahanglan kon ugaling simbako dunay mga pagpangatake sa mga terrorista.

Gikonsulta ba sa Mandaue ug Lapulapu ang kapolisan ug militar nga maoy labaw'ng nasayod sa kahimtang sa siguridad sa wa pa sila mohimo sa deklarasyon?

Kon ambulansiya ang gikinahanglan, kinahanglan ba gyud ang deklarasyon aron ta mopalit niini? Labing siguro kabahin ni sa pagpangandam sa organizing committee, nganong mag-alig alig man gyud ang mga LGUs.

Nganong di man nato tigumon ang tanang ambulansiya dinhi sa Sugbo aron magamit sa ASEAN? Gawas pa ang ERUF dunay daghang ambulansiya nga makatabang kaayo pagtubag sa panginahanglan. Kon tinguha gyud ninyo ang pagpalit og mga ambulansiya, nasayod naman tang daan nga anhi sa Sugbo himoon ang ASEAN summit nganong wa man ni ilakip sa inyong budget?

Di kong kasabot nganong adto kuhaon sa calamity fund ang pagpalit niini. Tungod ba kay wa na kinahanglana nga moagi sa kuting prosiso sa bidding kon calamity fund maoy gastohon ug nga mas sayon rang tayopion ang transaksiyon alang sa kaugalingong ginansiya?