'Banat News': Ang venue sa mga inilang magsusulat

Ang pagtak-op na pagpatik sa kanhing inilang mantalaan nga Binisaya, ang Alimyon, Bag-ong Suga, Silaw ug uban pa, nakapalibog pag-ayo sa ulo sa mga magsusulat sa Binisaya kun asa na lang nila ipadangat ang ilang mga sinulat nga nawala na man ang maong mga mantalaan sa sirkulasyon.

Daku kaayo ang kabalaka ug kahigwa-os sa mga magsusulat dihang nawala na sa sirkulasyon ang maong mantalaan nga maoy ilang kapadangatan sa ilang mga hinaguan nga mga sinulat. Nangaliya sila sa Kahitas-an nga unta may mga magpupuhonan nga mopahimugso kun mopatik ug laing mantalaan nga Binisaya.

Ang gipangandoy ug giampo natubag ra gayod sa kaulahian. Sama sa nagsiga nga daub kalit kining nasubhan sa tubig sa katumanan sa ilang gipangandoy. Kay may kapitalista nga mahigugmaon sa kulturang Binisaya, mibutang ug puhonan aron matukod ang usa ka mantalaang Binisaya ang -Banat News!

Ang Banat News tubag sa pangaliya sa mga magsusulat sa Sinugboanon, nahimugso kaniadtong Agosto 23, 1994. Usa kini ka matang sa peryodiko nga Binisaya giporma sa tabloid. Igsuon kini sa mantalaang Iningles ang The FREEMAN ug gipatik sa The FREEMAN Company, Inc. si Juanito V. Jabat, maoy publisher sa The FREEMAN/Banat News, ug siya usab ang editor-in-chief sa naulahi. Ang pagkahimugso sa Banat News gikalipay kaayo ug daku sa mga magdadagang nga Binisaya kay may daku na silang kahigayonan nga mapatik ang ilang mga sinulat.

Ang Banat News may daku ug kalainan sa kadungan niini nga gipatik nga peryodiko nga Binisaya usab. Kay ang dahon sa Banat News puno ug nag-awas sa mga makasaysayong mga sinulat gikan sa mga tadhan ug naila na kaayong mga magsusulat. Sangkap usab ang mga dahon niini sa lab-as nga balita, sugilanon bahin sa gugma ug kahibulongang panghitabo, balak, gumalaysay, showbiz, komentaryo, paugnat sa kusog ug uban pa.

Unang mga magsusulat nga magtampohan sa ilang mga sinulat, gani ang uban kanila nagpadayon pa gihapon pagtampo sa Banat News, mao sila si Ernesto A. Amatiaga, Melchor Yburan, Franklin Villa, Paul A. Aquino, Carlos Poloyapoy, Teodoro Sanchez, Rudy Pescante, Romulous B. Cabahug (PSK), Beeboth Duetes, Javier Tapulado, Quir Laping de Gracia, Genaro Labay, Longinus Belarmino, Jr., Ismaelita Ybañez, Josie Cuizon de Gracia, ug Ramon Arong.

Dulcesimo Catulpos, Val Nuñez Parame, Ronnie Catadman, Uldarico Rios Suello, Joel ug Lito Solon, Harry Timtim, Fabuez Bacalso Badana, Quintin Lanipga, Conrado Cabalhug Sr., Joe Granada, Goddy Secuya, ug Herwin Timtim. Pipila kanila nagtampohan pa ning mantalaan ug ang uban gitay-an na tingali ang ilang mga dagang ug wala na makahigayon sa pagpanulat. Uban usab kanila tingali mitaliwan na ngadto sa laing kalibutan.

Nagpabilin ug makita pa gihapon ang ilang mga bylines sa Banat News hangtod karon sila si Edwin Ian Melecio (staff member na sa BN), Pepe Sollano, Romeo L. Limpangog, Darrel Carumba, Wen Celen, Quir Laping de Gracia, Brenda Batuto, Rosalie B. Vallecera Fred F. Monternel.

Mga kolumnista anaa sila si Leo Lastimosa, Rene Borromeo, Uriel C. Vallecera, Lucky P. Malicay, Antolin dela Serna, Reynaldo T. Cui, ug Frances Savellon (PSK).

Sa Showbiz anaa usab sila si Kriss Relatado, Ann Las Cruces, Ace Espinosa ug karong bag-o pa si Ryan Mark ug Brenda Batuto. Kabahin sa mugbong sugilanon (gugma ug kahibulongan) balak, gumalaysay, ug sports anaa usab sila si Ret. Col. Rudolfo Vaño, Carmelo Lariosa, Ernesto A. Amatiaga, Bart M. Panilagao, Oliver Flores, Melchor Yburan, Javier Tapulado, Toto Maluluy-on, Beeboth Duetes ug Tom Degum.

Kusog kaayo ang dagan sa panahon ug wala lang damha ang mantalaang Banat News, nagpanuigon na ug napulo ug usa ka tuig. Ug magsaulog na kini sa iyang adlaw nga kasumaran sa iyangpaghimugso sa natad sa katiktikang Binisaya karong Agosto 23. Usa na usab kini ka sakop sa The Philippine Star Group of Publication ug ang pinalabing gibasa sa Kabisay-an ug Mindanao.

Mabuhi ka Banat News ug hinaut pa unta molanat ka pa ug daghang katuigan sa imong pag-alagad sa mga magbabasang Binisaya!