Nganong pahoy ang SRA
Karong giaprobahan na ni Presidente Ferdinand Marcos Jr. ang iyang resignasyon isip administrador sa Sugar Regulatory Administration (SRA), bisan kon unya pa sa Abril 15 siya makabiya sa puwesto kay mangita pa ang Malacañang og ikapuli niya, mahimo bang ipasabot ni David John Thaddeus Alba unsay papel sa iyang ahensiya sa nabisto nga Malacañang-sponsored sugar smuggling?
Pananglitan, nahibawo bang SRA bisan sa wa pa nila pirmahi ug ipublikar ang Sugar Order No. 6, nidunggo na sa pantalan sa Batangas ang 5,000 metric tons nga asukar gikan sa Thailand?
***
Kon nahibawo ang SRA sa pag-abot sa 260 ka 20-footer nga containers sa imported sugar niadtong Pebrero 9, unom ka adlaw sa wa pa ang publikasyon sa sugar order niadtong Pebrero 15, unsa man ang ilang gihimo?
Nisuway ba sila sa pagpakisayod nganong mas sayo nga gihimo ang importasyon sa way pagpaabot sa ilang sugo sa SRA? Gi-alerto ba nila ang Bureau of Customs posibleng kaso sa smuggling? Sa laktod, gihimo ba sa SRA ang ilang trabaho? O nagpalingug-lingog na lang pagkahibawo nga ang Malacañang maoy nag-apura sa importasyon?
***
Laing angay nga ipasabot ni Alba:
• Nganong niyango man ang SRA memorandum nga ilang nadawat gikan ni Agriculture Senior Undersecretary Domingo Panganiban niadtong Pebrero 27 nga nagsugo sa pag-release sa kontrabando nga asukar?; ug
• Nganong nisugot man ang SRA sa sugo ni Sebastian sa samang memorandum nga, imbes sa naandang public bidding sa import quota licenses, gipili nang daan ang tulo ka importers nga maoy makasipong sa 440,000 metric tons nga komprahon karong tuiga?
***
Nganong ang SRA wa man mobaraw ni Panganiban nga klarong nakalapas sa ilang gahom pagduma sa mga importasyon sa asukar? Nganong wa man kapahinumdom ni Panganiban nga angayng ipaagi sa SRA ug di magbuut-buot silang Executive Secretary Lucas Bersamin ug bisan si Presidente Marcos sa pagtugot sa importasyon ug pagpili sa ilang paboritong importers?
Nakamatngon bang SRA nga mora silang pahoy nga gawas nga gilaktawan sa importasyon mao pay gisugo pagpalusot sa nangalisbo nga mga transaksiyon? Di kahibudngan nga nitaas pag-ayong blood pressure ni Alba. Nakaseguro kong tambagan sa mga doktor nga makatabang sa iyang kahimsog ang limpiyo nga konsiyensiya.
- Latest
