Pareha ug panagang ug pulos sayop
Pareha ang panagang sa Pilipinas ug Russia sa mga imbestigasyon sa International Criminal Court (ICC) batok sa ilang mga opisyal tungod sa mga pasangil sa crimes against humanity way hurisdiksiyon ang ICC sa ilang mga nasud:
•Nipirma ang Pilipinas sa Rome Statute niadtong tuig 2000 ug gi-ratify sa Senado niadtong 2011, pero nigawas ang administrasyon ni kanhi Presidente Rodrigo Duterte gikan sa ICC niadtong 2019; ug
•Nipirma ang Russia sa Rome Statute niadtong tuig 2000 ug nitabang sa ICC pero wa mo-ratify sa statute ug nibakwi sa ilang pirma niadtong 2016.
***
Pulos sayop ang depensa sa Pilipinas ug Russia. Dunay hurisdiksiyon ang ICC nilang kanhi Presidente Duterte sa Pilipinas ug Russian President Vladimir Putin kay:
•Nagpabiling hurisdiksiyon sa ICC sa mga krimen sa katuigan nga sakop pang Pilipinas, 2011 ngadto sa 2019, maong gi-imbestigar sa ICC ang laktod nga pinatyanay sa Davao City sa mayor pa si Duterte ug sa unang tulo ka tuig sa iyang pagduma sa Malacañang; ug
•May hurisdiksiyon ang ICC ni Putin kay ang mga krimen nga gipasangil batok niya nahitabo sa Ukraine nga sakop sa ICC.
***
Bisan dunay hurisdiksiyon nilang Duterte, Putin ug kaubanan, way mahimo ang ICC sa pagpatuman sa arrest warrants ug ubang mga sugo batok sa mga sinumbong sa ilang mga imbestigasyon:
•Nideklarar na si Presidente Ferdinand Marcos Jr. nga di siya magpasakop pagbalik sa ICC ug nga di motabang ang iyang administrasyon ug gani ni-apelar sa pagpahunong sa imbestigasyon sa extrajudicial killings sa kampanya sa drugas sa pamunoang Duterte; ug
•Di mahitabo nga mosugot si Putin nga dakpon sa iyang kaugalingong gobyerno ug i-surender sa ICC.
***
Pero nabulit si Putin sa kalibotanong pagsaway sa nabistong mga ebidensiya tungod sa imbestigasyon sa ICC ug United Nations nga pagdagit sa mga bata sa Ukraine, pagpatan-aw nila samtang gilugos ug gi-torture ang mga ginikanan, ug pag-target sa mga sibilyan sa mga bombardiyo sa Ukraine.
Samang kauwawan ang mahiagoman sa gobyerno sa Pilipinas kon makaluwat na sab og arrest warrants ang ICC. Mahimong magpa-pating si Putin sama sa naandan. Makaagwanta ba si Marcos sa mga pakauwaw nga di man siyay gipasanginlan sa bangis nga mga krimen ug nagpahumot man siya sa ubang kanasuran?
- Latest
